வெளியான 24 மணி நேரத்தில் 365 மில்லியன் பார்வைகள் பெற்று, உலக அளவில் அதிகம் பார்க்கப்பட்ட டீசர் என்ற சாதனையை மார்வெலின் ‘டெட்பூல் & வோல்வரின்’ டீசர் படைத்துள்ளது.
புகழ்பெற்ற மார்வெல் கதாபாத்திரங்களில் ஒன்றான டெட்பூல் கதாபாத்திரத்தை அடிப்படையாகக் கொண்டு இதுவரை ‘டெட்பூல்’, ‘டெட்பூல் 2’ ஆகிய படங்கள் வெளியாகி பெரும் வரவேற்பை பெற்றன. அந்த வரிசையில் இதன் மூன்றாம் பாகம் தற்போது உருவாகி வருகிறது. இப்படத்தில் எக்ஸ் மென் படங்கள் மூலம் பிரபலமான வோல்வரின் கதாபாத்திரமும் இடம்பெற்றுள்ளதால் இப்படத்துக்கு பெரும் எதிர்பார்ப்பு நிலவுகிறது. இப்படத்துக்கு ‘டெட்பூல் & வோல்வரின்’ என்று தலைப்பிடப்பட்டுள்ளது.
இப்படத்தின் டீசர் இந்திய நேரப்படி கடந்த திங்கள் (பிப்.12) அதிகாலை யூடியூபில் வெளியானது. இந்த நிலையில், வெளியான 24 மணி நேரத்தில் 365 பார்வைகளைக் கடந்து இந்த டீசர் சாதனை பெற்றுள்ளது. மேலும் உலக அளவில் இதுவரை வெளியான டீசர்களில் 24 மணி நேரத்தில் அதிக பார்வைகளைப் பெற்ற டீசர் என்ற பெருமையையும் பெற்றுள்ளது.
இதற்கு முன்னால், மார்வெலின் ‘ஸ்பைடர்மேன்: நோ வே ஹோம்’ (355.5 மில்லியன்), ‘அவெஞ்சர்ஸ்: எண்ட்கேம்’ (289 மில்லியன் ) ஆகிய படங்களில் டீசர்கள் அதிக பார்வைகளை பெற்ற டீசர்களாக இருந்த நிலையில், தற்போது அந்த சாதனையை ‘டெட்பூல் & வோல்வரின்’ உடைத்துள்ளது.
