ஏற்றுமதியில் உலகில் முதலிடம் பெறுகிறது சீனா

உலகின் மிகப்பெரிய ஏற்றுமதி செய்யும் நாடு என்கிற இடத்தில் இருந்த ஜெர்மனியை பின்னுக்கு தள்ளிவிட்டு அந்த இடத்தை சீனா பிடித்திருக்கிறது.

பிராங்க்பர்டில் வெளியிடப்பட்ட புள்ளிவிவரங்களின்படி கடந்த ஆண்டின் முதல் 11 மாதங்களில், ஜெர்மனி ஆயிரத்தி ஐம்பது பில்லியன் டாலர் பெறுமதியான பொருட்களை ஏற்றுமதி செய்திருக்கிறது.

இதே காலகட்டத்தில் சீனாவானது, இதைவிட இருபது பில்லியன் டாலர் பெறுமதியான பொருட்களை ஏற்றுமதி செய்ததாக, சீனா வெளியிட்டிருக்கும் புள்ளிவிவரங்கள் கூறுகின்றன.

2009ஆம் ஆண்டின் கடைசி மாதத்தில் இந்த இருநாடுகள் ஏற்றுமதி செய்த பொருட்களின் புள்ளிவிவரங்கள் இந்த நிலையைப் பெரிதாக மாற்றாது என்றே கருதப்படுகிறது.

இந்த தகவல்கள் உறுதிசெய்யப்பட்டால், உலக அளவிலான சீனாவின் முதன்மைத்துவம் இதன் மூலம் உறுதிசெய்யப்படும்.

உலகின் இரண்டாவது பெரிய பொருளாதாரம் என்கிற இடத்திலிருக்கும் ஜப்பானை புறந்தள்ளிவிட்டு அந்த இடத்திற்கும் சீனா இவ்வாண்டு வரும் என்று எதிர்பார்க்கப்படுகிறது.