Top

‘கபாலி’ டீஸர்: குவிகிறது நட்சத்திரங்களின் வாழ்த்து

May 2, 2016

rajini

ரஜினி நடிப்பில் வெளியாகி இருக்கும் ‘கபாலி’ டீஸருக்கு பல்வேறு திரையுலக நட்சத்திரங்கள் தங்களது வாழ்த்துகளைத் தெரிவித்து வருகிறார்கள்.

ரஞ்சித் இயக்கத்தில் ரஜினி, ராதிகா ஆப்தே, கலையரசன், தன்ஷிகா உள்ளிட்ட பலர் நடிப்பில் உருவாகி இருக்கும் படம் ‘கபாலி’. தாணு தயாரித்திருக்கும் இப்படத்துக்கு சந்தோஷ் நாராயணன் இசையமைத்து வருகிறார். இப்படத்திற்கு இன்னும் சில காட்சிகள் மட்டுமே படப்பிடிப்பிற்கு இருக்கின்றன. படத்தின் டப்பிங் பணிகள் மும்முரமாக நடைபெற்று வருகிறது.

“மே 1-ம் தேதி காலை 11 மணிக்கு ‘கபாலி’ டீஸர் யூ-டியுப் தளத்தில் வெளியிடப்படும்” என்று தயாரிப்பு நிறுவனம் அறிவித்தது. இதனைத் தொடர்ந்து ரஜினி ரசிகர்கள் ஆவலோடு காத்திருந்தார்கள்.

‘கபாலி’ டீஸரின் சாதனை

‘கபாலி’ டீஸர் வெளியானதைத் தொடர்ந்து ரஜினி ரசிகர்கள், திரையுலகினர் என பலரும் பகிர்ந்தார்கள். இதனால் #KabaliTeaser என்ற ஹேஷ்டேக் இந்தியளவில் ட்ரெண்ட்டானது. இயக்குநர் ராம்கோபால்வர்மா, ராஜமெளலி போன்ற இதர மொழி இயக்குநர்களும் ‘கபாலி’ டீஸரைப் பாராட்டி புகழ்ந்திருந்தார்கள்.

டீஸர் முடியும் தருவாயில் ரஜினி கூறும் ‘மகிழ்ச்சி’ என்ற வசனமும் பிரபலமாகி வருகிறது. பலரும் தங்களுடைய பதிலாக மகிழ்ச்சி, மகிழ்ச்சி என்று பதிவிடுவதை சமூக வலைதளத்தில் காண முடிகிறது.

சில மணி நேரத்திற்கு ஒரு முறை எவ்வளவு பேர் பார்த்திருக்கிறார்கள் என்ற கணக்கு யூ-டியுப் தளத்தில் காட்டும். அதன்படி ‘கபாலி’ டீஸர் வெளியான 5 மணி நேரத்தில் சுமார் 7,84,842 பேர் பார்த்திருக்கிறார்கள். குறைந்த நேரத்தில் அதிக பேர் விருப்பம் தெரிவித்த முதல் டீஸர் என்ற சாதனையும் ‘கபாலி’ டீஸர் பெற்றிருப்பது குறிப்பிடத்தக்கது.

‘கொலவெறி’ சாதனையை முறியடிக்குமா?

இதுவரை ‘கொலவெறி’ பாடல் மட்டுமே அதிகப் பேர் பார்த்த வீடியோ என கூறப்படுகிறது. 4 மணி நேரத்திலேயே 4 லட்சத்திற்கும் அதிகமானோர் பார்த்திருப்பதால், அச்சாதனையை ‘கபாலி’ டீஸர் முறியடிக்கும் என்கிறார்கள்.

மேலும், இப்படத்தின் இயக்குநர் ரஞ்சித், இசையமைப்பாளர் சந்தோஷ் நாராயணன்,

ரூ.3 கோடி செலவு; ரூ.3 லட்சம் வரவு: டெல்லி கணேஷ் குமுறல்

May 1, 2016

dk

சம்பாத்தியமே இல்லாமல் ரூ.3 கோடி போட்டுட்டு ரூ.3 லட்சம் சம்பாதித்தால் என்ன முடிவெடுக்க முடியும்” என்று டெல்லி கணேஷ் தெரிவித்திருக்கிறார்.

டெல்லி கணேஷ் தயாரிப்பில் அவருடைய மகன் மகா, வின்சென்ட் அசோகன், அண்ணாமலை உள்ளிட்ட பலர் நடிப்பில் ஏப்ரல் 22ம் தேதி வெளியான படம் ‘என்னுள் ஆயிரம்’. இப்படத்திற்கு போதிய வரவேற்பு கிடைக்கவில்லை.

இந்நிலையில் டெல்லி கணேஷ் தனது படத்திற்கு நிலவிய பிரச்சினை என்ன என்பதை வாட்ஸ்-அப் பேசி நண்பர்களுக்கு பகிர்ந்திருக்கிறார்.

அதில் டெல்லி கணேஷ் பேசியிருப்பது, “’என்னுள் ஆயிரம்’ என்ற படத்தை எடுத்து எப்படியோ ரிலீஸ் பண்ணிட்ட ஒரு தயாரிப்பாளர் நான். ரொம்ப சிரமம். யாருமே மதிக்க மாட்டேங்கறாங்க. ஒரு இந்தி படம், தெலுங்கு படம், ஆங்கில கார்ட்டூன் படம் இதுக்கு எல்லாம் முக்கியத்துவம் கொடுக்கறாங்க. தமிழ் வாழ்க, தமிழன் என்று சொல்லடா தலைநிமிர்ந்து நில்லடா என்றெல்லாம் சொல்றாங்க.. ஆனால் தமிழ்நாட்டில் தமிழ் படத்திற்கு ஒரு ஷோ கொடுக்க மாட்டேங்கறாங்க.

அந்த இந்திப் படத்தையும், ஆங்கில படத்தையும் மதியம் 1 மணிக்கு போட்டால் ஒன்றும் குடிமுழுகி போகப் போறதில்லை.. பார்ப்பார்கள். ஆனால், நம்ம படத்தை மதியம் 1 மணிக்குப் போட்டால் ஒரு பய வரமாட்டேங்கறான். 3 மணி ஷோ இல்லையா சார், 6 மணி ஷோ இல்லையா சார் அப்படினு கேக்கறாங்க. அது ரொம்ப மோசம்.

திருச்சியில் எல்லாம் என் படம் ரிலீஸாகவே இல்லை. கோயம்புத்தூரில் கொடுத்திருக்கும் தியேட்டர் எங்கேயோ ஒரு ஓரத்தில் இருக்கிறது. திருநெல்வேலியில் ஒரு ஷோ கூட எங்கேயோ ஒரு மூலையில் இருக்கும் தியேட்டரில் கொடுத்திருக்கிறார்கள். அதில் ஏ.சி. கூட கிடையாது. ‘உங்களுக்காக தான் போனேன் சார்.. இல்லையென்றால் மனுஷன் போக மாட்டான்’ என்கிறார்கள். ஒன்றரை மணிக்கு வருகிற படங்களுக்கு வாசலில் ப்ளாக்கில் டிக்கெட் விற்கும் பையன் என்ன சொல்கிறான் என்றால் “இதெல்லாம் உப்புமா கம்பெனி என்று சொல்வார்கள்.. நார்மலா” என்கிறான்.

3 கோடி ரூபாய் போட்டு நல்ல தொழில்நுட்ப கலைஞர்களை வைத்து படமெடுத்தால், ஒன்றரை மணிக்கு ரிலீஸானால் உப்புமா கம்பெனி என்று சொல்வார்களாம். யார் சொல்றா.. ப்ளாக்ல டிக்கெட் விற்கிறவன் சொல்றான். எல்லாருக்கும் எல்லாமும் தெரிந்திருக்கிறது. நமக்குத் தான் ஒண்ணும் தெரிய மாட்டங்குது. யாரும் சொல்லவும் மாட்டேன்கறாங்க. என்ன பண்றது.. யார்கிட்ட போய் கேட்கிறது?

தியேட்டர் கிடைக்கல.. 1ம் தேதி வந்தால், ஐயோ வந்திராதீங்க.. 8ம் தேதி வந்தால் நிறைய படம் வருகிறது, பக்கத்திலேயே வந்திராதீங்க. 14ம் தேதி அய்யோ ’தெறி’ வருது.. 22ம் தேதி, ம்ம்ம் பார்க்கலாம். ’தெறி’ எப்படி போனாலும் உங்களுக்கு வரும் கூட்டம் வரும் என்று ஆரம்பித்து, இப்ப, ‘நீங்க 29 வந்திருக்க வேண்டும் சார். ஏன் 22 வந்தீங்க?’ என்று கேட்கிறார்கள்.

மொத்தத்துலே என்னமோ பைத்தியக்காரன் மாதிரி ஆக்கிடறாங்க. சரி போகட்டும். ஒரு படம் எடுத்து நிறைய கற்றுக் கொண்டேன். இத்தனை வருடங்களில் கற்றுக் கொள்ளாதது எல்லாம் இப்போது கற்றுக் கொண்டேன். நண்பரும் பகை போல் தெரியும், அது நாட்பட நாட்பட புரியும் அப்படிங்கிற பாட்டு தான் ஞாபகத்திற்கு வருகிறது.

எல்லாரும் சேர்ந்து என்ன முடிவெடுக்கணும் என்று தெரியாதபடி, என்ன கொஞ்சம் சம்பாதித்தால் முடிவெடுக்க உட்காரலாம். சம்பாத்தியமே இல்லாமல் 3 கோடி போட்டுட்டு 3 லட்சம் சம்பாதித்தால் என்ன முடிவெடுக்க வருவான். பார்ப்போம். ஆவண செய்வோம்.” என்று அந்த ஆடியோ பதிவில் தெரிவித்திருக்கிறார்.

’கபாலி’ டீசர் சற்று முன் வெளியானது

May 1, 2016

rajini

கலைப்புலி தாணு அறிவித்திருந்தபடி ’கபாலி’ டீசர் சற்று முன் வெளியானது.

அவரது ஸ்டைலான நடையென்றாலும், ஸ்பீடாக இல்லாமல் ஸ்டைலிஷாக நடந்து வர’ நெருப்புடா’ என்றொலிக்கிறது பிஜிஎம்.

வரச்சொல்லுடா அவனை என்றதும், எந்த கபாலின்னு நெனைச்ச? என்று ‘கபாலிக்கு’ விளக்கம் கொடுக்கிறார் ரஜினி. ஒரு நொடி, பூப்போட்ட சட்டையில் ‘சிவாஜி’ பட ரஜினி சாயலிலும் வருகிறார். ஃப்ளாஷ்பேக்காக இருக்க வேண்டும்.

கபாலி டீசரில், மிக முக்கியமாய்ப் பாராட்டப்பட வேண்டியவர் சந்தோஷ் நாராயணன். தன் சிறப்பையும் விட்டுக் கொடுக்காமல், அதிரிபுதிரி தடாலடி இசையெல்லாம் இல்லாமல் ஒருவித ஹீரோயிச பிஜிஎம் குடுத்திருக்கிறார். டீசர் பார்த்து முடித்ததுமே அந்த பிஜிஎம்மை உங்கள் உள்ளம் முணுமுணுக்கும். வெல்டன் சந்தோஷ்.

பா.ரஞ்சித்தின் ட்ரேட் மார்க்கான ‘மகிழ்ச்சி’யை ரஜினி சொல்ல… முடிகிறது டீசர்.

வெளியான 15 நிமிடங்களில் ஐம்பதாயிரம் பார்வையாளர்களைத் தொட்டிருக்கும் அந்த டீசர்.. இதோ உங்களுக்காக…

ஷாரூக்கானின் ‘ரயீஸ்’ படத்துக்கு எதிராக வழக்கு

May 1, 2016

saru

பிரபல பாலிவுட் நடிகர் ஷாரூக்கான் நடிப்பில் ‘ரயீஸ்’ என்ற படம் உருவாகி வருகிறது. குஜராத்தில் 1980-களில் கள்ளச்சாரய தொழிலில் ஈடுபட்டு, தாதாவாக மாறிய அப்துல் லத்தீப் என்பவரின் வாழ்க்கையை அடிப்படையாகக் கொண்டு இந்தப் படம் தயாரிக்கப்பட்டுள்ளது.

இப்படம் வரும் ஜூலை 3-ம் தேதி வெளியாகும் என அறிவிக்கப்பட்டுள்ளது. இந்நிலையில் இப்படத்தை வெளியிடவும் விளம்பரப்படுத்தவும் தடை விதிக்க கோரி, தாதா அப்துல் லத்தீபின் மகன் முஸ்தாக் அகமது அகமதாபாத் உரிமையியல் நீதிமன்றத்தில் வழக்கு தொடர்ந்தார்.

அவர் தனது மனுவில், “இந்தப் படத்தின் திரைக்கதை ஆய்வு செய்யப்பட்டபோது, எங்கள் குடும்பத்தினரிடம் கலந்து ஆலோசித்தனர். எனது தந்தையின் வாழ்க்கைதான் படமாக எடுக்கப்படுவதாக தயாரிப்பாளர்கள் விளம்பரம் செய்தனர்.

இந்நிலையில் இந்தப் படத்தின் இரண்டாவது பாதி, எனது தந்தைக்கு மிகுந்த அவதூறு ஏற்படுத்தும் வகையில் உள்ளது. இதனால் எங்கள் குடும்பத்தின் நற்பெயர் பாதிக்கப்பட்டுள்ளது. இதற்கு இழப்பீடாக ரூ.101 கோடி வழங்க உத்தரவிட வேண்டும்” என்று கூறியுள்ளார்.

இம்மனு நீதிபதி ஆர்.டி.வாஸ்தானி முன்னிலையில் விசாரணைக்கு வந்தது. அப்போது ஷாரூக்கானின் தயாரிப்பு நிறுவனமான ரெட் சில்லீஸ் என்டெர்டைன்மென்ட், இணை தயாரிப்பு நிறுவனங்

களான எக்ஸெல் என்டெர்டைன்மென்ட், ராகுல் தோலக்கியா புரொடக் ஷன்ஸ் ஆகிய நிறுவனங்கள் மே 11-க்குள் பதில் அளிக்க நீதிபதி உத்தரவிட்டார்.

குஜராத் மதுவிலக்கால் உருவான அப்துல் லத்தீப்

ஆர்.ஷபிமுன்னா

அப்துல் லத்தீப் சிறுவனாக இருந்தபோது, கடந்த 1970-களில் மகாராஷ்டிரத்தில் இருந்து குஜராத்தின் அகமதாபாத்துக்கு சிறிய அளவில் வெளிநாட்டு வகை மது புட்டிகளை கடத்தி வந்தார்.

இதன் வளர்ச்சியாக கள்ளச்சாராய உற்பத்தியிலும் இறங்கிய லத்தீப், அவற்றின் விற்பனைக்காக சூதாட்ட கிளப்புகளையும் தொடங்கினார். இதை தனது பருவ வயதில் தொடங்கிய லத்தீப், அங்கு பணம் தராமல் போதையில் கலாட்டா செய்பவர்களை உதைத்து பணம் வசூல் செய்யத் தொடங்கினார். இதனால் மெல்ல மெல்ல உள்ளூர் தாதாவாக உருவானார்.

அப்போது மும்பையின் மூத்த தாதாக்களான கரீம் லாலா, ஹாஜி மஸ்தான், வரதராஜ முதலியார் ஆகியோர் பற்றி திரைப்படங்கள் வெளிவரத் தொடங்கின. இதைப்பார்த்து உற்சாகம் அடைந்த லத்தீப், அவர்கள் பாணியிலேயே பொதுமக்களுக்கு நன்மைகள் செய்யத் தொடங்கினார்.

குறிப்பாக அகமதாபாத்தில் முஸ்லிம்கள் வசிக்கும் பகுதிகளில் சேவையில் ஈடுபட்டிருந்தார். 1980-களில் குஜராத்தில் மதக்கலவரங்கள் நடந்தபோது இந்தச் சேவை அதிகமானது.

இதனால் கிடைத்த பேரும் புகழும் லத்தீப்பை அரசியலில் நுழைய வைத்தது. அகமதாபாத் மாநகராட்சி தேர்தலில் இவர், ஒரே சமயத்தில் ஐந்து வார்டுகளில் போட்டியிட்டு, ஐந்திலும் வெற்றிபெற்று சாதனை படைத்தார்.

இதனால் லத்தீப் முதல்முறையாக குஜராத்துக்கு வெளியேயும் பேசப்பட்டார்.

இந்த செல்வாக்கு அவருக்கு அரசியல் எதிரிகளை உருவாக்கியது. இதையடுத்து தலைமறைவான லத்தீபை டெல்லியில் 1995-ல் குஜராத் போலீஸார் கைது செய்தனர். பிறகு குஜராத்தின் சபர்மதி சிறையில் விசாரணைக் கைதியாக அடைக்கப்பட்டார்.

1997-ல் நீதிமன்ற விசாரணைக்கு செல்லும் போது லத்தீப் தப்பி ஓட முயன்றதாக என்கவுன்ட்டரில் கொல்லப்பட்டார். அப்போது, குஜராத்தில் சங்கர் சிங் வகேலா முதல்வராக இருந்தார்.

அவரது உத்தரவின் பேரிலேயே என்கவுன்ட்டர் நடந்ததாக லத்தீப் மகன்கன் கருதினர்.

எனவே இன்றும் வகேலாவுக்கு எதிரான இவர்களின் அரசியல் விரோதம் தொடர்கிறது.

கமலின் வாக்களிப்பு சர்ச்சை ராஜேஷ் லக்கானி பதில்

May 1, 2016

kam

இந்த தேர்தலில் நான் முடிந்தால் வாக்களிப்பேன் என்று தெரிவித்த கமலுக்கு, தலைமை தேர்தல் அதிகாரி ராஜேஷ் லக்கானி பதிலளித்திருக்கிறார்.

ராஜீவ்குமார் இயக்கத்தில் கமல், ஸ்ருதி ஹாசன் உள்ளிட்ட பலர் நடிக்கும் ‘சபாஷ் நாயுடு’ படத்துவக்க விழா சென்னையில் நடைபெற்றது. அதனைத் தொடர்ந்து நடைபெற்ற பத்திரிகையாளர் சந்திப்பில் “மே 16-ல் நான் இங்கு இல்லை. என்னுடைய வாக்கை யாராவது போட்டு விடுவார்கள்.

இதற்கு முன்பு எனக்கு ஓட்டு இல்லை என்றார்கள். அப்போது நான் கெஞ்சிக் கேட்டு, “இல்லீங்க… நான் இன்னும் இந்திய பிரஜை தான் என்று சொன்னேன்”.

பாவம்…தேர்தல் ஆணையத்தில் இருப்பவர்கள் எல்லாம் எனக்கு நண்பர்கள் தான். நானும் முடிந்தால் இங்கு வந்து வாக்களித்துவிட்டு செல்வேன்” என்று தெரிவித்தார் கமல்.

கடந்த தேர்தலின்போது தேர்தல் விழிப்புணர்வு விளம்பரத்தில் தோன்றி, ‘அனைவரும் வாக்களிக்க வேண்டும்’ என்று கூறிய கமல், “இந்தமுறை வாக்களிப்பது சந்தேகம்தான்” என்று கூறியிருப்பதை சமூக வலைதளங்களில் பலரும் விமர்சித்துள்ளனர்.

மற்றவர்களுக்கு அறிவுரை சொல்லும் கமல், முதலில் அதுபோல் தான் நடந்து காட்ட வேண்டாமா என்று கேள்வி எழுப்பினர்.

இதுதொடர்பாக தமிழக தலைமை தேர்தல் அதிகாரி ராஜேஷ் லக்கானி, வெளியிட்டுள்ள பதிவில் ‘கமலுக்கு இந்தத் தேர்தலில் வாக்களிக்கும் உரிமை உள்ளது. அவரது பெயர் வாக்காளர் பட்டியலில் உள்ளது’ என்பதை தெளிவுபடுத்தியுள்ளார்.\

“சமுதாயத்தில் ஒரு ரோல் மாடலாக திகழும் நீங்கள் தயவுசெய்து வாக்களிக்க வேண்டும்” என்றும் அந்தப் பதிவில் ராஜேஷ் லக்கானி குறிப்பிட்டு இருந்தார்.

’24′ வெளியீட்டால் ‘கோ 2′ ரிலீஸ் தேதியில் மாற்றம்

May 1, 2016

ko-2

மே 6ம் தேதி ’24′ வெளியாக இருப்பதால், ‘கோ 2′ வெளியீட்டை மே 13ம் தேதிக்கு மாற்றி இருக்கிறார்கள்.

சரத் மாந்தவா இயக்கத்தில் பாபி சிம்ஹா, பிரகாஷ் ராஜ், நிக்கி கல்ரானி நடிப்பில் தயாராகி வரும் படம் ‘கோ 2′. லியோ ஜேம்ஸ் இசையமைத்து வரும் இப்படத்தை ஆர்.எஸ் இன்போடெய்ன்மன்ட் நிறுவனம் தயாரித்து வருகிறது.

இப்படத்தின் பாடல்கள் மற்றும் ட்ரெய்லருக்கு இணையத்தில் நல்ல வரவேற்பு கிடைத்திருக்கிறது.

இப்படத்தின் சென்சார் பணிகள் முடிவடைந்தைத் தொடர்ந்து மே 6ம் தேதி வெளியாகும் என்று அறிவித்தார்கள்.

ஆனால், அதே வேளையில் சூர்யா நடித்திருக்கும் ’24′ வெளியாவது உறுதியாகி இருக்கிறது.

தற்போது ‘கோ 2′ வெளியீட்டை மே 13ம் தேதிக்கு தள்ளி வைத்திருக்கிறார்கள்.

அரசியலை கதைக்களமாக கொண்டது ‘கோ2′. தமிழகத்தில் தற்போது தேர்தல் களம் சூடு பிடித்திருப்பதால் ‘கோ 2′ படத்தை இந்தக் காலத்தில் வெளியிடுவது குறிப்பிடத்தக்கது.

முதல் பார்வை: மனிதன் – கவனத்துக்கு உரியவன்!

April 29, 2016

bh

உதயநிதி – ஹன்சிகா இணைந்து நடிக்கும் இரண்டாவது படம், ‘என்றென்றும் புன்னகை’ படத்துக்குப் பிறகு அஹமத் இயக்கும் அடுத்த படம் என்ற இந்த காரணங்களே மனிதன் படத்தைப் பார்க்கத் தூண்டின.

படத்தின் ட்ரெய்லர் தந்த நம்பிக்கையில், உதயநிதிக்கு இந்தப் படமாவது நடிகர் அங்கீகாரத்தைத் தருமா என்ற யோசனையுடன் தியேட்டருக்குள் நுழைந்தோம்.

‘மனிதன்’ மகுடம் சூட்டுவானா?

கதை: பெரிய வக்கீல் ஆகி சாதிச்ச பிறகுதான் சொந்த ஊருக்குப் போக வேண்டும் என்ற லட்சியத்துடன் சென்னை வருகிறார் உதயநிதி. தன்னை நிரூபிக்க ஒரு பொதுநல வழக்கு தொடர்கிறார். அந்த வழக்கு என்ன? யார் அதில் சம்மந்தப்பட்டிருக்கிறார்கள்? அந்த வழக்கைத் தொடர்ந்ததால் உதயநிதி சந்திக்கும் மோதல்கள், இழப்புகள் என்ன? இறுதியில் லட்சியத்தை அடைந்தாரா? என்பது மீதிக் கதை.

உதயநிதி சாதாரண வக்கீல் கதாபாத்திரத்துக்கு சரியாகப் பொருந்துகிறார். கோபப்படுவது, கலவரம் ஆவது, குழம்புவது, வருத்தப்படுவது என்று எல்லாவற்றுகும் ஒரே மாதிரி ரியாக்‌ஷன் கொடுக்கிறார். அதை மட்டுமாவது இனிமேல் கவனிங்க உதய். மற்றபடி ஸ்லோமோஷனில் பேசும் போதும், லோ டெசிபலில் சாந்தமாக, உண்மைக்குக் குரல் கொடுக்கும்போதும் கவனம் பெறுகிறார். இனிவரும் காலங்களில் உதயநிதி நடிப்பதற்கான அறிகுறிகள் தென்படுகின்றன.

வழக்கம் போல வந்து போகாமல் ஹன்சிகா நன்றாக நடித்திருக்கிறார். உன்னை எப்படிடா லவ் பண்ணேன் என்று கேட்டும் அதே ஹன்சிகா, நீ வக்கீல் தொழிலுக்கு லாயக்கு இல்லை என்று கோபமுகம் காட்டும் போதும், அறிவுரை சொல்லும் போதும் இயல்பாக ஈர்க்கிறார்.

வெடுக்கென கோபப்படுவதும், திமிரோடு திரிவதுமாக சீனியர் வழக்கறிஞர் கதாபாத்திரத்தில் பிரகாஷ்ராஜ் வெல்டன்! இதென்னா கோர்ட்டா, டாக் ஷோ வா? என கோபத்தைக் கொப்பளிக்கும் பிரகாஷ்ராஜ் டாக் ஷோவில் விவாதம் செய்யும் நபராக மாறி எக்ஸ்ட்ரா எனர்ஜியை வரவழைத்துக்கொண்டு சப்தமிடுவதுதான் குறை.

எல்லாம் நான் பார்த்துக்கிறேன் என்று பிரகாஷ்ராஜிடம் சொல்லும் ராதாரவி ஒரு கட்டத்தில் அவரை கட்டுப்படுத்தும் காட்சிகளில் தியேட்டர் அதிர்கிறது. இக்கட்டான சூழலிலும் கூலாக சொல்லும் ராதாரவியின் பதில்களுக்கு அப்ளாஸ் அள்ளுகிறது.

கமலக்கண்ணன் உடைந்த குரலில் சாட்சி சொல்லும்போது தியேட்டர் முழுக்க நிசப்தம்… சிலர் கண்களில் கண்ணீர் எட்டிப் பார்த்தது.

விவேக்கின் நகைச்சுவை மொழியை விட, அவரது மௌன மொழியும், சைகை மொழிகளும் ரசிக்க வைத்தன. ஐஸ்வர்யா ராஜேஷின் டப்பிங் உறுத்துகிறது. ஒரு நிருபர் தூங்கிக்கிட்டு இருந்த, வழக்கு போட்டார் என்றா தமிழ் பேசுவார்? ஆனால், ஐஸ்வர்யா தான் கதைய நகர்த்தப் பயன்பட்டிருக்கிறார்.

மயில்சாமி, செல்முருகன், அங்கனா ராய், சங்கிலி முருகன் ஆகியோர் பொருத்தமான தேர்வு. பவர் ஸ்டார் சீனிவாசனைத் தவிர்த்திருக்கலாம்.

மதியின் ஒளிப்பதிவும், சந்தோஷ் நாராயணின் இசையும் படத்துக்கு கூடுதல் பலம். சில காட்சிகளில் நடிப்பைக் காட்டிலும், இசையே நிரம்பி இருக்கிறது.

மணிகண்ட பாலாஜி முதல் பாதியில் கொஞ்சம் கத்தரி போட்டிருக்கலாம்.

‘ஜாலி எல்எல்பி’ இந்தி திரைப்படத்தை ரீமெக் செய்திருக்கும் அஹமத் சில எமோஷன் காட்சிகளை கச்சிதமாக வடிவமைத்துள்ளார். ஆனால், சில நீதிமன்றக் காட்சிகள் நாடகத்தனத்தில் இருந்து விடுபடவே இல்லை.

”இங்கே வாய்மையே வெல்லும் போர்டைத் தூக்கிட்டு நீதி விற்கப்படும்னு எழுதுங்க.” , ”யூனிஃபார்ம்ல இருக்குறவங்களே கை நீட்டும்போது, சட்டையே இல்லாதவங்க என்ன பண்ணுவாங்க?”

” காசு கொடுத்தா எல்லாம் கிடைக்காது. மரியாதையும், சந்தோஷமும் வந்துடுமா?” , ” நான் ஜெயிக்கிறேனா தோற்கிறேனா தெரியாது. ஆனா, கடைசிவரைக்கும் உண்மையா போராடுவேன்” போன்ற அஜயன் பாலா – அஹமத் வசனங்களுக்கு அதிக கரவொலிகள் எழும்பின.

சந்தை கடை மாதிரி நீதிமன்றத்தில் அவன் இவன், யோவ் என்று மரியாதை குறைவாக வாக்குவாதம் செய்வார்களா? குற்றப் பின்னணி அறியாமல் ஒரு சீனியர் வழக்கறிஞர் வாதாடுவாரா? எதையுமே சொல்லாத மீடியா தான் இதற்கெல்லாம் காரணம் என்று பிரகாஷ்ராஜ் மேம்போக்காக ஜல்லியடிப்பது ஏன்? (படத்தில் ஒரு மீடியாவைத்தான் தனித்துவப்படுத்துகிறார்கள்.) நீதிபதியே சபை நாகரிகம் இல்லாமல் கையில் கிடைத்தை தூக்கி எறிய முயற்சி செய்வாரா? போன்ற பல கிளைக் கேள்விகள் எழுகின்றன. கதாபாத்திர வடிவமைப்பிலும் சறுக்கல்கள் இருக்கின்றன.

இவற்றைத் தவிர்த்துப் பார்த்தால், இரண்டாம் பாதி ரசிகர்களை போரடிக்காமல் படம் பார்க்க வைக்கிறது. அந்த விதத்தில் ‘மனிதன்’ கவனத்துக்கு உரியவன் ஆகிறான்.

மனிதன்’ தமிழ் அல்ல வரிச்சலுகை மறுப்பு

April 29, 2016

mani

மனிதன்’ என்பது தமிழ் வார்த்தை அல்ல என்று கூறி, வரிச்சலுகை அதிகாரிகள் இப்படத்திற்கு வரிச்சலுகையை மறுத்திருக்கிறார்கள்.

உதயநிதி ஸ்டாலின் நாயகனாக நடித்திருக்கும் ‘மனிதன்’ திரைப்படம் இன்று வெளியாகி இருக்கிறது. அஹ்மத் இயக்கி இருக்கும் இப்படத்தை ரெட் ஜெயண்ட் நிறுவனம் தயாரித்திருக்கிறது.

சென்சார் அதிகாரிகள் ‘யு’ சான்றிதழ் வழங்கியவுடன், இப்படத்திற்கு வரிச்சலுகைக் கோரி தயாரிப்பு நிறுவனம் விண்ணப்பித்தது. ‘மனிதன்’ படத்தை பார்த்த வரிச்சலுகைக் குழு, இப்படத்திற்கு வரிச்சலுகை கொடுக்க முடியாது என்று மறுப்பு தெரிவித்திருக்கிறது.

ஏன் என்று விசாரித்த போது ‘மனிதன்’ என்ற வார்த்தை தமிழ் வார்த்தை அல்ல. சமஸ்கிருத வார்த்தை என்று தெரிவித்திருக்கிறது. மேலும், நீதிமன்றத்தை அவமதிக்கும் வகையில் காட்சிகள் இருப்பதாகவும் தெரிவித்திருக்கிறது.

இந்நிலையில், வரிச்சலுகை குழுவின் இந்த முடிவை எதிர்த்து, திங்கட்கிழமை நீதிமன்றத்தில் வழக்கு தொடர தயாரிப்பு நிறுவனம் முடிவு செய்திருக்கிறது.

இதற்கு முன்பு உதயநிதி தயாரித்த படங்களுக்கு வரிச்சலுகை மறுக்கப்பட்டு, நீதிமன்றத்தில் வழக்கு தொடர்ந்திருப்பது குறிப்பிடத்தக்கது.

அடுத்த விஜய்யா நானா? பதறும் ஆதித்யா டிவி அஸார்!

April 29, 2016

sun

ஆதித்யா டிவியில சின்னவனே பெரியவனேவிற்குப் பிறகு, மூன்று நான்கு படங்கள் என்று அடுத்த படிக்குத் தாவியிருக்கும் அஸாரிடம் ஒரு மினி பேட்டி:

உண்மைய சொல்லுங்க என்ன படிச்சிருக்கீங்க?

“ சத்தியமா நான் ஒண்ணுமே படிக்கலை.. ஆமாங்க டென்த் படிச்சேன், அப்பறம் டிப்ளமோ படிச்சேன். DCI அத முடிச்சிட்டு இன்ஜினியரிங் பண்ணனும்னு நினைச்சேன். ஆனா என்ன பண்ண டிப்ளமோவுலயே அரியர். அத முடிச்சுட்டு அப்படியே மீடியா எண்ட்ரீ ”

நயன்தாரா தான் உங்க அடுத்தப் பட ஹீரோயின்னா, உங்க மைண்ட் வாய்ஸ் என்னவா இருக்கும்?

“கண்ணா லட்டு திங்க ஆசையா?’ இதுதான் அந்த மைண்ட் வாய்ஸா இருக்கும்… ஆனால் இதெல்லாம் சாத்தியமான்னு கேட்டா கண்டிப்பா டவுட்டுதான். பார்ப்போம்… ஒருவேளை நடந்தாக் கூட, தம்பி ரோல்ல நடிக்க விட்ருவாங்க!”

நீங்க மட்டும் இல்லன்னா அந்த விஷயம் முடக்கமாயிடும், அப்படி எதாவது இருக்கா?

“ அப்படி ஒண்ணுமே இல்ல , நம்ம இருந்தா தான் எந்த விஷயமும் முடக்கமாகும்!”

லவ் லைஃப் , புரபோசல்கள் பத்தி குறிப்பு எழுதுங்க பாஸ்?

“ஹூக்கும்…இப்போ தான் என் ஃபேஸ்புக் போட்டோவுக்கே சில பொண்ணுங்க கிட்டருந்து லைக் விழ ஆரம்பிசிருக்கு, அப்பறம் கமெண்ட்ஸ், அப்பறம் ஜன்னலோரம் சீட்டு, அப்பறம் வளையோசை கலகல. இதுக்கெல்லாம் நிறைய காலம் இருக்கு… ஆனால் நான் நிறைய அப்ளிகேஷன்ஸ் குடுத்திருக்கேன்!”

பலகுரல்ல பேசுவீங்களாமே எங்க திருக்குறள்ல பேசுங்க பார்க்கலாம்?

“ இப்படி நம்மல அடிக்கடி வம்புல மாட்டி விடறதே வேலையாப் போச்சு… நான் திருக்குறள் மட்டும் இல்ல, அதுக்கு அர்த்தமும் சொல்லுவேனே… அகர முதல எழுத்தெல்லாம் ஆதி பகவன் முதற்றே உலகு.. (குறளையும், பொருளையும் ரஜினிகுரலிலேயே சொல்லிமுடிக்கிறார்)

மீடியாவுக்குள்ள வரலைன்னா என்னவா ஆகியிருப்பீங்க?

கண்டிப்பா சேல்ஸ் ஃபீல்ட்லதான் இருந்திருப்பேன், இருந்துகிட்டே கடைசி வைரைக்கும் மீடியா, சினிமான்னு ட்ரை பண்ணியிருப்பேன்!”

விக்ரமன் படத்துல நடிச்சிருக்கீங்களே? அந்த வாய்ப்பு எப்படி கிடைச்சது?

“ நான் ஒரு நண்பரோட நிகழ்ச்சியில மிமிக்ரி பண்ணிகிட்டு இருந்தேன், அப்போதான் விக்ரமன் சார் என்ன பார்த்து ஃப்ரண்ட் ஒருத்தர் கிட்ட பேசச் சொல்லி சொல்லியிருந்தாரு. நானும் கூலா கால் பண்ணி என்ன விக்ரமன் சார் பேச சொன்னாருன்னு கேட்டேன். அவரும் அவரோட வீட்டுக்கு வழியெல்லாம் சொல்றாரு, நான் பேசுறது விக்ரமன் சார்னே தெரியாம பேசி கடைசியில போய் பார்த்தா அவர் கிட்டதான் தெனாவெட்டா வழி கேட்டு போயிருக்கேன், சொல்லுங்க சார் என்ன ஃபங்ஷன்னு கேட்டேன், நடிக்கிறியான்னு கேட்டாரு, விட்ருவோமா?!”

உங்க ஓட்டு யாருக்கு?

“என் கிட்ட எந்த ரகசியமும் நிக்காது, இதாவது ரகசியமா இருக்கட்டுமே, கண்டிப்பா நல்ல ஓட்டா இருக்கும், கள்ள ஒட்டா இருக்காது!”

சினிமா அடுத்து பாடகர், அரசியல் இதுதான் பிளானா?

“ சத்தியமா பாட்டேல்லாம் பாட மாட்டேன், அரசியல்லாம் பெரிய விஷயம், நிறைய நடிப்பேன் அதுதான் என் ட்ரீம்!”

பிடிச்ச விஜே யாரு?

“எல்லார் கிட்டயும் ஒரு தனித்துவம் இருக்கும். அதனால எல்லாரையும் பிடிக்கும்.. முக்கியமா சிவகார்த்திகேயன் என் கிட்டயே நிறைய கேட்டு கேட்டு தெரிஞ்சுப்பாரு. கொஞ்சம் கூட ஹெட் வெயிட் இருக்காது. அவ்ளோ பாராட்டுவாரு, அவ்ளோ பணிவானவர். ரியோவும் பிடிக்கும்.. இப்படி விஜேக்கள் சொல்லிகிட்டே போகலாம்!”

பலம் பலவீனம் என்ன?

“ நான் எல்லார் கூடவும் ஈஸியா ஃப்ரெண்டாகிடுவேன், ஃப்ரெண்ட்ஸ் தான் அவ்ளோ ஹெல்ப் பண்ணியிருக்காங்க. கொஞ்சம் ஞாபக மறதி ஜாஸ்தி அது தான் பலவீனம்!”

ஹையா ஜாலின்னு நீங்க ஃபர்ஸ்ட் டே ஃபர்ஸ்ட் ஷோ பார்க்கற படம் எந்த ஹீரோவோடதா இருக்கும்?

“ எனக்கு எல்லா ஹீரோவும் பிடிக்கும், ரஜினி, கமல், விஜய், அஜித் எல்லாரையும் பிடிக்கும்!”

பொண்ணுங்க கிட்டதான் வயசு கேக்கக் கூடாது பாஸ்?

“ஜூன் 7, 1987 என்னோட பிறந்தநாள்…இப்போ சொல்லுங்க என்னோட வயசு என்னான்னு!”

செம மொக்க வாங்கின மொமெண்ட்?

“ மிமிக்ரி ஆர்டிஸ்ட்கள் எல்லாருமே இந்த மொக்கைகள் வாங்கியிருப்போம்… இந்த ஸ்டேஜ் நிகழ்ச்சிகள்ல நாம அப்போ தான் கெத்தா விஜய் வாய்ஸ் பேசியிருப்போம், யாராவது கூட்டத்துல எழுந்து நின்னு சரி சரி விஜய் வாய்ஸ் பேசுன்னு சொல்லுவாங்க பாருங்க… செம பல்ப்பா இருக்கும்!”

கல்யாணம் எப்போ?

“ எனக்கு இப்பவே வெட்கமா இருக்கு… கல்யாணம் எப்போ …ஆமா எப்போ… நானும் எங்க வீட்ல கேட்டுகிட்டு இருக்கேன்!”

அடுத்தடுத்தப் படங்கள் என்னென்ன?

“ சாரல், ஏண்டா தலையில எண்ணை வைக்கல, கடலைப் போட ஒரு பொண்ணு வேணும் மூணு படங்கள் நடிச்சிட்டு இருக்கேன்!”

விக்ரமன் உங்களை விஜய்யோட கம்பேர் பண்ணி பாராட்டியிருக்காரே?

“ விஜய் சாரோட கம்பேர் பண்றதுக்கெல்லாம் எனக்கு தகுதி கிடையாது, அவரோட டை ஹார்ட் ஃபேன் நான். விக்ரமன் சார் விஜய் சார புகழ்ந்துட்டு, அவரு மாதிரி இவனும் வரணும்னு சொன்னாரு. அவ்ளோதான். நடக்கணும். விஜய் ஸ்டைல்ல சொல்லணும்னா.. ஹே…ஹே…ஹே ஐ’ம் வெயிட்டிங்!

-ஷாலினி நியூட்டன்

விஜய், அஜித்தை விட பெரிய ஆள் இவர்

April 29, 2016

ina

சு.சி.ஈஸ்வர் இயக்கத்தில் புதுமுகங்கள் நடிப்பில் உருவாகியுள்ள படம் இணைய தலைமுறை. இப்படத்தின் இசை வெளியீட்டு விழா இன்று நடந்தது.

நிகழ்ச்சியில் சிறப்பு விருந்தினர்களாக சகாயம் ஐ.ஏ.எஸ், சமுத்திரக்கனி, தங்கர் பச்சான், ஆர்.கே.செல்வமணி உள்ளிட்ட பலரும் கலந்துகொண்டனர். அதில் ஆர்.கே.செல்வமணியை ரோஜாவின் ராஜா எனக்கூறி பேசுவதற்கு அழைத்தனர்.

பேச ஆரம்பித்தவர், ரோஜாவின் ராஜாவாகவே அறியப்பட்ட நான் மக்களாட்சி என்னும் படம் எடுத்த இயக்குநராக இன்னும் அறியப்படவில்லை. தமிழ் நாட்டு மக்கள் அப்படியான ஒரு பாதையில் சென்றுகொண்டிருக்கிறார்கள்.

அந்த லட்டில் வந்த பூந்தி தானே நீங்களும். எம்ஜிஆர் பேசிய அதே விஷயங்கள் தான் இப்போது உள்ளவர்களும் பேசுகிறார்கள். ஆனால் அன்று அவர் மக்களுக்காக பேசுகிறார் என மக்கள் நம்பினார்கள்.

இப்போது நிலையே வேறு நல்லவர்களும், மாணவர்களும்,படித்தவர்களும் அரசியலுக்கு வரவில்லை எனில் ரவுடிகள் தான் நாட்டை ஆள்வார்கள். இது நம் தவறா இல்லை அவர்கள் தவறா சொல்லுங்கள்.

இன்று குடிக்கச் சொல்லும் அரசு மே 19ம் தேதிக்குப் பிறகு குடிக்க வேண்டாம் எனக் கூட சொல்லலாம்.இப்படி நம் வாழ்வே மற்றவர்கள் தீர்மானிக்கும் நிலையில் உள்ளது. அப்படி இருக்கையில் நம் வாழ்வை தீர்மானிக்கும் ஒரு விஷயத்தில் நாம் பங்கெடுக்காமல் இருக்கலாமா?.

ஒரு மனிதர் நேர்மையாக இருந்ததற்காகவே 23 முறை இடம் மாற்றலாகியிருக்கிறார்.இந்த விழாவிற்கு வரும் போது என் வீட்டில் சாப்பிடாமல் இப்படி மதிய சாப்பாட்டு வேளையில் செல்கிறீர்களே என்றனர்.

அதற்கு இல்லை நிகழ்ச்சியில் மிகவும் முக்கியமானவர் வருகிறார் என்றேன். அதற்கு அப்படி யார் வருகிறார் விஜய்யா, என்றனர், இல்லை அவரை விட பெரிய ஆள் இவர், அப்போ அஜித்தா என்றார்களா இல்லை அவரை விடவும் பெரிய ஆள் என்றேன். சகாயம் ஐ.ஏ.எஸ் வருகிறார் என்றேன்.

இன்று கருணாநிதியையும், ஜெயலலிதாவையும் எதிர்க்கக் கூடிய ஒரே ஆம்பள இவர் தான். விலைபோகாத மனிதர். நாங்கள் இயக்குநராக ஹீரோக்கள் இண்ட்ரொடக்‌ஷனுக்காக பலவாறு யோசிப்போம்.

ஆனால் சகாயத்தின் ஒவ்வொரு செயலும் ஒரு ஹீரோவின் இண்ட்ரொடக்‌ஷனாக இருக்கிறது. ஒரு நரபலி கொடுத்த விஷயத்தைக் கண்டறிய ஒரு மனிதர் அங்கேயே கட்டிலைப் போட்டா தூங்குவார்? இப்படி யாராவது ஒரு ஹீரோவுக்கு இண்ட்ரோ சிந்திக்க முடியுமா? நான் அவருக்கு ரசிகர் என்றவர் படத்தையும், படக்குழுவையும் வாழ்த்தி விடைபெற்றார்.

- ஷாலினி நியூட்டன் -

Next Page »