Top

ஹார்வார்டு பல்கலைக்கழகத்தில் கமலஹாசன் ஆற்றிய உரை

February 8, 2016

havart

அமெரிக்காவின் பிரபல ஹார்வார்டு பல்கலைக்கழகத்தில் நடைபெறும் இந்திய மாநாட்டில் நடிகர் கமல்ஹாசன் ‘கருத்து சுதந்திரம்’ என்ற தலைப்பில் உரையாற்றினார். அப்போது அவர் பேசும்போது,

கருத்துச் சுதந்திரம் காதலைப் போன்றது. காதல் இருக்கும் இடத்தில் மன்னிப்பு கேட்க வேண்டிய தேவையே இருக்காது என்பது எல்லோருக்கும் தெரிந்த விஷயம். என்னவெல்லாம் சொல்ல நினைக்கிறீர்களோ? அது அத்தனையையும், மன்னிப்புக் கேட்பதற்கான அவசியம் ஏற்படுவதற்குள் சொல்லி முடிக்க உங்களால் இயல வேண்டும், அதுதான் கருத்துச் சுதந்திரம். அதுவும்கூட நீங்கள் உங்கள் உள்ளத்திலிருந்து சொல்வதாக இருக்க வேண்டும் – மன்னிப்பு கேட்பதைச் சொல்கிறேன்.

‘கருத்துச் சுதந்திரம்’ என்ற தலைப்பை நான்தான் தேர்ந்தெடுத்துக் கொண்டேன். என்னை இங்கு அழைத்தவர்களுக்கும் அதில் நம்பிக்கை இருக்கிறது என்று நினைக்கிறேன். எனக்கு இந்தச் சுதந்திரத்தை அளித்தவர்களுக்கு நன்றி சொல்லிக் கொள்கிறேன்.

நான் ஏன் இந்தத் தலைப்பை தேர்ந்தெடுத்துக் கொண்டேன்? அதுவும், ஏன் இப்போது? திரைத்துறையைச் சேர்ந்தவனாக, என் கருத்துகளைச் அச்சமின்றி வெளிப்படுத்துபவனாக, அத்தனை நம்பிக்கைகளையும் கேள்விக்குட்படுத்தும் வகையில் சிந்திப்பவனாக இருப்பதால்தான் திடீரென்று என் கருத்துச் சுதந்திரம் பறிபோவது பற்றி பயப்படுகிறேனா? அரசியல் அல்லது சமய சக்திகள் எதுவும் என் பேச்சுரிமையை முடக்கும் வகையில் அசம்பாவிதமாகவோ அச்சுறுத்தும் வகையிலோ அண்மையில் எந்த முயற்சியாவது மேற்கொண்டிருக்கிறதா? இல்லை, அரசியல்வாதிகளும் சமய நம்பிக்கை உள்ளவர்களும், இருவருமே அப்படி நடந்து கொண்டிருக்கிறார்களா?

உண்மையைச் சொல்வதானால், அப்படியெல்லாம் இல்லை. துல்லியமாகச் சொல்வதானால், அதுபோல் எதுவுமில்லை. பரம்பரை பரம்பரையாக என் முன்னோர்கள் வழி வந்த அக்கறையில்தான் நான் குரல் கொடுக்கிறேன். என் முன்னோர்கள் தங்கள் நிலை குறித்து தங்களுக்கு இருந்த ஆழ்ந்த அக்கறையைப் பறைசாற்றிய தலைமுறையினர்.

கமல்ஹாசனின் பிரச்சினைதான் என்ன? தான் அச்சுறுத்தப்பட்டது போல் கருத்துச் சுதந்திரத்தைப் பற்றி பேசத் தேர்ந்தெடுக்க அவனுக்கு என்ன குறை இருக்கிறது? அதிலும் சுதந்திரங்கள் தழைக்கும், குறிப்பாக, பேச்சுச் சுதந்திரம் சிறப்பிக்கப்படும் ஜனநாயகத்தின் கோட்டை, அமெரிக்காவில் அதைப் பேச வேண்டிய அவசியம் என்ன? இங்கு நீங்கள் நினைத்ததைச் சொல்ல முடியும், ராப் பாட முடியும், கெட்ட வார்த்தை பேச முடியும், உங்கள் கல்வியைக் காட்டிக் கொள்ள கௌரவமான மொழியையும் பயன்படுத்திக் கொள்ள முடியும். அப்படிப்பட்ட சுதந்திரம் இங்கு இருக்கிறது. இதுவா கருத்துச் சுதந்திரம்? இந்தச் சுதந்திரம் போதுமா?

இதுபோன்ற ஒரு சுதந்திரத்தை பல நூற்றாண்டுகளுக்கு முன்பே லண்டனில் ஹைட் பார்க் வழங்கியிருக்கிறது. உரையாற்றுவதற்கான வாய்ப்பு வழங்கிய அது சோப் பாக்ஸ் பேருரை என்று அழைக்கப்பட்டது. வரலாற்றினூடே எத்தனை கள்ளத்தனமாக நகர்ந்தாலும் சரி, மக்களை ஒடுக்கும் சந்தர்ப்பவாத அரசியலின் கரங்களைப் பலரும் தெளிவாக, பல நூற்றாண்டுகளாய் தெளிவாகக் கண்டு வந்திருக்கின்றனர். ரோமின் செனேட் முதல் இந்நாளைய செனேட் வரை.

கருத்துச் சுதந்திரம் பாதுகாக்கப்படும் அரண் ஜனநாயகம் மட்டும்தான் என்று கொண்டாடப்படுகிறது. ஆனால், ஜனநாயகம் அப்படியொன்றும் அப்பழுக்கற்ற அரசியல் அமைப்பு அல்ல என்று சொல்லும்போது என் கருத்து கேள்விக்குட்படுத்தப்படுகிறது. கொதிக்கிறார்கள், ஆத்திரப்படுகிறார்கள்.. சிவப்பு என் அரசியலின் நிறம் என்று நினைக்கிறார்கள். ஆனால் அது உண்மையல்ல என்பதை நான் இங்கு சொல்ல வேண்டும். இதுதான் என் மதம் என்பதுபோல் ஒரே உணவு உண்பவர்கள் போலில்லாமல் நான் அரசியல் சித்தாந்தங்கள் நிறைந்த இந்த சர்வதேச பஃப்பே விருந்தில் திளைக்கிறேன். உணவுச் சங்கிலியின் உச்சத்தில் இருக்க வேண்டுமென்றால் மனிதனும் உணவுப் பழக்கத்தைப் போலவே எல்லாம் உண்டு செரிக்க வேண்டும் என்று நான் நினைக்கிறேன். எனக்கு மதம் கிடையாது. ஆனாலும் மேன்மையான, இணக்கமான வாழ்வு வாழ நான் சில அபூர்வமான, நுட்பமான விஷயங்களை மதத்தில் இருந்தும் வெட்கமில்லாமல் பயன்படுத்திக் கொள்கிறேன்.

சமூகத்தில் நிலவும் அத்தனை நோய்களுக்கும் இறுதி தீர்வு, ஒரே தீர்வு என்று ஜனநாயகமோ, கம்யூனிசமோ, பாசிசமோ அல்லது எந்த ஒரு இசமுமோ இருக்க முடியாது என்று நான் நினைக்கிறேன். கடந்த பத்தாயிரம் ஆண்டு காலமாக நாம் வெவ்வேறு கலவைகளை முயற்சி செய்து பார்த்துக் கொண்டிருக்கிறோம். இன்னும் நாம் முன்னேற்றப் பாதையைக் கண்டறிந்தபடிதான் இருக்கிறோம். நம் சமூக அமைப்பே முன்னேற்றப் பாதையை நோக்கிச் செல்லும் முயற்சிதான். மனித மனமே முன்னேற்றப் பாதையில் வளர்ந்து வருகிறது என்று சில விஞ்ஞானிகளும்கூட சொல்கிறார்கள். எனவே, எந்த ஒரு அரசியல் சித்தாந்தத்தையும் நம் துன்பங்கள் அத்தனைக்கும் தீர்வு கண்டு விட்டது என்று நான் ஏற்றுக் கொள்ள மாட்டேன்.

ஜனநாயகத்தில் மட்டுமே கருத்துச் சுதந்திரம் இருக்க முடியும் என்ற உண்மையை நீ மறுக்க முடியுமா என்று என்னிடம் கடுமையாகக் கேட்கப்பட்டது உண்டு. ஆனால் வங்கி லாக்கரில் வைக்கப்பட்ட பணம் போல் சுதந்திரத்தைப் பொத்திப் பாதுகாக்க முடியாது. ஆபத்து காலத்தில் எடுத்து பயன்படுத்திக் கொள்ளும் வரை வட்டி போட்டு வளரட்டும் என்று அதைப் பூட்டி வைக்க முடியாது.

கருத்துச் சுதந்திரத்தைப் பாதுகாக்க வேண்டுமென்றால் நாம் எப்போதும் எச்சரிக்கையாக இருந்தாக வேண்டும். நுட்பமான முறையில் நம்மைக் கட்டுப்படுத்தும் அரசியல் அதிகாரத்துக்கு எதிராக எப்போதும் காவல் நிற்கும் மிகப்பெரிய ஒரு சமூகத்தின் உறுப்பினன் நான். அதனால்தான் கலாசாரத்தின் பெயராலும் அரசின் பெயராலும் பிற குரல்களையும் திரைப்படங்களையும் பிறர் அறியாத வகையில் தணிக்கை செய்யும் திரைப்பட தணிக்கை அமைப்பின் செயல்பாட்டைச் சீர்திருத்தும் வகையில் பரிந்துரைகள் செய்வதற்காக அமைக்கப்பட்டிருக்கும் கமிட்டியில் பணியாற்றும் வாய்ப்பை நான் விரும்பி ஏற்றுக் கொண்டிருக்கிறேன்.

நான் இங்கே ஜனநாயகத்தை விமரிசிக்கவோ கம்யூனிசத்தையோ சோஷலிசத்தையோ போற்றிப் புகழவோ வரவில்லை. ஊடகங்களின் வழியாகவும் நான் சொல்வதை ஏற்றுக் கொள்ளத் தயாராய் உள்ள திறந்த உள்ளங்களின் மூலமாகவும் கருத்துச் சுதந்திரம் பாதுகாப்பாக இருக்கும் என்று நினைத்துக் கொண்டு நாம் ஜனநாயகம் என்றால் தானாகவே அது கருத்துச் சுதந்திரம் என்று பொருள்படுகிறது என்ற நினைப்பில் கவனமில்லாமல் இருந்து விடக்கூடாது என்று பதிவு செய்யவே நான் இந்த வாய்ப்பைப் பயன்படுத்திக் கொள்கிறேன். ஜனநாயக அமைப்பைப் பயன்படுத்திக் கொண்டுதான் ஹிட்லர் ஆட்சிக்கு வந்தார். அது உலகம் வெகுளியாய் இருந்த காலம், இனி அதுவெல்லாம் சாத்தியமில்லை என்று சிலர் சொல்கிறார்கள். நாம் வரலாற்றில் சற்றே முன்னோக்கிச் சென்றால், இந்திய அரசியல் வரலாற்றில்கூட அவசர நிலைச் சட்டம் பிரகடனப்படுத்தப்பட்டு உலகறிய எதிர்ப்புக் குரல்கள் நசுக்கப்பட்டதைப் பார்க்கிறோம்.

இங்கு நான் என் தேசத்தைக் குறை சொல்வதாகப் புரிந்து கொள்ளக் கூடாது. அதிகார துஷ்பிரயோகம் செய்ய எத்தனையோ முயற்சிகள் செய்யப்பட்டபோதும் நடைமுறையில் வெற்றி கண்டிருக்கும் நம் ஜனநாயகம் குறித்து நான் பெருமைப்படுகிறேன் என்பதுதான் உண்மை. இங்கிலாந்திலும் அமெரிக்காவிலும் நூற்றாண்டுகளாய் நிலவும் ஜனநாயகத்துடன் ஒப்பிடும்போது இந்திய ஜனநாயகம் மிகவும் இளையது. ஆனாலும்கூட அமெரிக்க ஜனநாயக அமைப்பில் நடைமுறைக்கு வருவதற்கு பதினைந்து ஆண்டுகளுக்கு முன்னரே இந்தியாவில் அத்தனை குடிமக்களுக்கும் ஓட்டுரிமை வழங்கப்பட்டு விட்டது.

சுதந்திரமோ கருத்துச் சுதந்திரமோ, அது ஜனநாயகத்தால் வழங்கப்படவில்லை. மாறாய், கருத்துச் சுதந்திரமும் பிற சுதந்திரங்களுமே ஜனநாயகத்தை சாத்தியப்படுத்தி இருக்கின்றன. ஜனநாயகத்தின் இயல்பை வடிவமைத்து அதற்கு கலாசார பலம் அளித்தது கருத்துச் சுதந்திரம்தான். அதுவரை ஒடுக்கப்பட்டிருந்த குரல்கள் மார்டின் லூதர் கிங்கின் சிறப்பான தலைமையில் இணைந்து ஓங்கி ஒலித்தன. அவரது குருதியை மையாய்க் கொண்டு இந்த மண்ணின் சட்டம் திருத்தி எழுதப்பட்டது. அதன் பின்னரே அமெரிக்காவில் மாற்றம் ஏற்பட்ட காலம் பிறந்தது.

இந்தியா மட்டுமில்லை, உலகமே மாறிக் கொண்டிருக்கிறது. இனி வரும் உலகம் புதிய சவால்களை எதிர்கொண்டு புதிய வாய்ப்புகளை காணப் போகிறது. என் வாழ்நாளில் எல்லைக் கோடுகள் மங்கி மறையும் என்றுகூட என்னால் நம்பிக்கை கொள்ள முடிகிறது. நம்மைக் கட்டுப்படுத்தும் குட்டிச்சுவர்களைப் பற்றி பெருமைப்பட்டுக் கொண்டிருப்பவர்களாக இல்லாமல் நாம் அனைவரும் மெல்ல, ஆனால் உண்மையாகவே உலகக் குடிமகன்களாய் ஆவோம் என்ற நம்பிக்கை பிறக்கிறது. அது நடப்பதற்கு முன் பற்பல விசில்கள் அடிக்கப்படும். கருத்துச் சுதந்திரத்தைப் பிரதிபலித்து பாதுகாக்கும் ஊடகத்தில் இருக்கும் அதிர்ஷ்டம் எனக்கு கிடைத்திருக்கிறது, அது குறித்து நான் பெருமைப்படுகிறேன். கருத்துக் சுதந்திரத்தைக் காக்க மறைமுகமாய் போராடும் ஊடகம் இது, தேவைப்பட்டால் இந்த ஊடகத்தைக் கொண்டு நேருக்கு நேர் மோதவும் முடியும்.

இதை எல்லாம் ஹார்வர்டில் பேசப் போகிறீர்களா, என்று என் நண்பர்கள் சிலர் திகைப்புடன் கேட்டார்கள், சிலரால் நம்ப முடியவில்லை. கல்விக் கட்டிட வளாகத்துக்குள் அளிக்கப்படும் பயிற்சிக் குறைவு எனக்கிருப்பது தொடர்ந்து நினைவுபடுத்தப்படுகிறது- நான் உயர்நிலைப்பள்ளிக்கு மேல் படிக்காதவன் என்பதை இங்கு தன்னடக்கத்துடன் நான் ஒப்புக் கொள்கிறேன். ஒரு காலத்தில் படிப்பை நிறுத்தியது பற்றி பெருமைப்பட்டுக் கொண்டே நான் கல்வி பெற்றவர்கள் வட்டத்தில் என் குறைகள் குறித்து யாரும் குற்றம் சொல்ல முடியாதபடி பழகிக் கொண்டிருந்தேன், என்பதையும் நான் சொல்லியாக வேண்டும். என்ன இருந்தாலும் நான் ஒரு நடிகன், என்னிடம் வேறு என்ன எதிர்பார்க்க முடியும்? தக்க வசனங்களை நான் அறிந்திருந்தேன்.

இப்போது, காலப்போக்கில் நான் கல்வியின் மதிப்பையும் கல்வி நிறுவனங்களின் மதிப்பையும் அறிந்து கொண்டிருக்கிறேன். மகத்தான இந்த அமைப்புகளும் தொடர்ந்து சீர்திருத்தங்களுக்கு உட்படுத்தப்பட வேண்டும் என்பது உண்மையாக இருக்கலாம். மாற்றமே நிலையானது, தேக்கம் செயலின்மைக்கும் பின்னடைவுக்கும் கொண்டு செல்லும் என்ற சாதாரண புரிதலை ஏற்றுக் கொள்கிறேன். அறிவியல்பூர்வமாய் முறைப்படி கற்றுக் கொடுக்கும் அமைப்புகளில், நீங்கள் தேர்ந்தெடுத்துக் கொண்ட துறையில் செய்திறனையும் அறிவையும் நோக்கி தொடர்ந்து முயற்சி செய்து வரும் உங்களைப் பார்த்து எப்போதும் பொறாமைப்படுகிறேன்.

மீண்டும் திரைப்படக் கல்லூரிக்குச் செல்ல வேண்டும் என்ற என் கனவை நான் சொல்வது ஒரு தன்னடக்கம் என்று குழப்பிக் கொள்கிறார்கள், அதுவும் பொய்யான தன்னடக்கம் என்று நினைக்கிறார்கள். நம்புங்கள், உண்மையாகவே அது தன்னடக்கம்தான், காலமும் அனுபவமும் கற்றுத்தந்த தன்னடக்கம் அது. அதுவும், இரக்கமின்றி எனக்குப் புகட்டப்பட்ட பாடம். நான் திரைத் துறையில் கழித்த காலத்தில் சின்னச் சின்ன உத்திகள் கற்றுக் கொண்டிருக்கிறேன். ஐம்பத்து சொச்சம் ஆண்டுகள். இருபத்து ஐந்து ஆண்டுகளில் நான் கற்றுக் கொண்டதை நல்ல ஒரு திரைக் கல்லூரி ஐந்து, அல்லது ஏழு ஆண்டுகளில் கற்றுக் கொடுத்திருக்கும். இதில் ஒரே வித்தியாசம், நல்ல ஒரு ஆறுதல் என்னவென்றால், நான் என் கல்விக்கு செலவு செய்யாமல் பணம் சம்பாதித்தேன். அது நல்ல கொடுக்கல் வாங்கல்தான் என்று நினைக்கிறேன்.

பல துறைகளிலும் இந்தியா பெரும்பாய்ச்சல் நிகழ்த்தப் போகிறது. நான் செயல்படும் துறையில், உண்மையாகவே உலகளாவிய சந்தையில் சர்வதேச அளவில் போட்டியிட இந்தியாவைத் தயாராக்கிக் கொண்டிருக்கிறோம். நூற்று இருபது கோடி மக்கள் கொண்ட ஒரு உள்ளூர் சந்தையே போதும் என்று அதன் குறுகிய எல்லைகளுக்குள் மகிழ்ச்சியாய் சிறைப்பட்டிருக்கக் கூடாது, இந்தியா விழிப்பு நிலையில் இருக்க வேண்டும் என்று விரும்புகிறோம். இந்தியா உலகளாவிய தரங்களை நிர்ணயிக்க கூடும் என்று விரும்புகிறோம். முன்னர் இதைச் செய்திருக்கிறோம். சத்தியாகிரகத்தின் முன்னோடிகளும் செயல்வீரர்களும் நாம்தான். ஹென்றி டேவிட் தோரோ உருவாக்கிய கோட்பாடு. நாம் அதை நடைமுறைப்படுத்தினோம். ராஜாஜி என்று அழைக்கப்படும் ராஜகோபாலாசாரிக்கும் நமக்கேயுரிய மோகன்தாஸ் கரம்சந்த் காந்திக்குமே இதற்கான பெருமை உரித்தாகும். மார்ட்டின் லூதர் கிங், மண்டேலா முதலான மகத்தான மனிதர்களுக்கு வழிகாட்டும் முன்னோடியானது இந்தியா. எப்போதும் சோர்விலன் என்று சொல்லத்தக்க அந்த மாமனிதர்களின் விழிப்புணர்வு நான் அச்சமின்றி, ஆனால் பொறுப்புணர்வுடன் பேசக் காரணமாகியிருக்கிறது.

அவர்களின் சுதந்திரப் போராட்ட வழிமுறையை மதிக்கிறேன். அபூர்வமான சில நிகழ்வுகளில், வன்முறையை அகிம்சையால் எதிர்கொண்டு கருத்துச் சுதந்திரம் வென்றடையப்பட்டது. அனைவர்க்கும் சாத்தியமான விஷயமில்லை இது. வன்முறையை அகிம்சை கொண்டு எதிர்கொள்வதற்கு அசாதாரண வீரம் வேண்டும்.

பொதுவாகவே தன்னடக்கம் கொண்டவராக திகழும் காந்தி, அகிம்சையே மிகவும் உயர்ந்த தீரம் என்று பெருமைப்பட்டுக் கொள்வதில் காரணம் உண்டு. அதனால்தான் இருபத்து நான்காம் தீர்த்தங்கரர், ஜைன முனிவர், அகிம்சையை போதித்தவர், மகாவீரர் என்று அழைக்கப்பட்டிருக்க கூடும். மகத்தான வீரர்.

அகிம்சை மிகக் கடினமான லட்சியம், புலால் மறுப்பு மூலம் மட்டும் அடையப்படுவது அல்ல அது. புலால் தவிர்க்கும் ஒருவன் சக மனிதனின் துயரங்களைக் கண்டு கொள்ளாதபோது அகிம்சையின் நோக்கம் தோல்வியடைகிறது. என் மனதில் எப்போதும் டார்வினின் கோட்பாட்டுக்கும் அகிம்சையின் வசீகரச் சித்தாந்தத்துக்கும் போராட்டம் நிகழ்ந்தபடியே இருக்கும். இது வேறொரு மேடையில் பேசப்பட வேண்டிய விஷயம்.

மீண்டும் நான் உங்களையும் என்னையும் தொடர்ந்து விழித்திருக்கும்படி நினைவுபடுத்திக் கொள்கிறேன். தன்னைக் காட்டிலும் பரந்த சமூகத்தைப் பொருட்படுத்தாமல் எந்த ஒரு அரசு அமைபுப்ம் மதமும் வெளிப்படையாகவோ மறைமுகமாவோ உங்கள் மனதைக் குறுகிய ஒரு தன்னலம் மிகுந்த நோக்கத்தின் பொருட்டு கட்டாயப்படுத்தும்போது, நாம் அது குறித்து எச்சரிகையோடு இருந்தாக வேண்டும்.

இவ்வாறு அந்த உரையில் பேசினார்.

பாகுபலி 2-ல் நடிக்கிறார் ‘விசாரணை’ அஜய் கோஷ்

February 8, 2016

ajy

‘விசாரணை’ படத்தில் போலீஸ் அதிகாரியாக நடித்து மிரட்டிய நடிகர் அஜய் கோஷ், ‘பாகுபலி’ படத்தின் இரண்டாம் பாகத்தில் கொள்ளைக்காரன் வேடத்தில் நடிக்கவுள்ளார்.

இதுபற்றி பேசிய அஜய் கோஷ், “நான் வீரய்யா என்கிற கொள்ளைக்காரனாக நடிக்கவுள்ளேன். படத்தில் அனுஷ்காவின் ராஜ்ஜியத்தில் வாழும் ஒருவன். கடந்த மாதம் கேரளாவில் 5 நாட்கள் படப்பிடிப்பில் நடித்துள்ளேன். மார்ச் மாதம் மீண்டும் படப்பிடிப்பில் இணையவுள்ளேன். மிகவும் சுவாரசியமான பாத்திரம் இது. ரசிகர்கள் என் பாத்திரத்தை எப்படி ஏற்ற்க் கொள்வார்கள் என்று தெரிந்து கொள்ள ஆர்வமாக உள்ளேன் ” என்றார்.

விசாரணையில் தன் நடிப்புக்கு கிடைத்த வரவேற்பு குறித்து பேசும்போது, “அது எதிர்மறையான பாத்திரமாக இருந்தாலும் மக்கள் அதை முழுமனதுடன் வரவேற்றுள்ளனர். இயக்குநருடன் முதல் காட்சியை பார்த்துவிட்டு வெளியே வரும்போது, யாருக்கும் என்னைப் பிடிக்காது என நினைத்தேன். ஆனால் அதற்கு நேர்மாறாக நடந்தது.

படத்தில் தினேஷை அடிக்கும் காட்சிகளில் நான் அழுதுவிட்டேன். நாங்கள் போலியான தடிகளை பயன்படுத்தியிருந்தாலும் அதை நாங்கள் பயன்படுத்திய வேகம் அதிகம். அந்தக் காட்சிகள் எனக்கு கஷ்டமாக இருந்தது ஆனால் படத்தின் முக்கிய காட்சிகள் அவை என்பதால் தொடர்ந்து படப்பிடிப்பு நடந்தது” என அஜய் கோஷ் கூறியுள்ளார்.

ஹாலிவுட் படத்தில் முக்கிய கதாபாத்திரத்தில் நடிக்கிறார் நாசர்

February 8, 2016

nasar

நடிகர் நாசர், ‘சோலார் எக்ளிப்ஸ்’ என்ற ஹாலிவுட் படத்தில், போலீஸ் அதிகாரி வேடத்தில் நடிக்கவுள்ளார். இந்தப் படத்தில் ஓம்புரி, ரஜத் கபூர், அனந்த் மஹாதேவன் உள்ளிட்ட நடிகர்களும் நடிக்கவுள்ளனர்.

நடிகர் நாசர், பல்வேறு மொழிகளில் 200 படங்களுக்கும் அதிகமாக நடித்துள்ளார். அவர் ஆங்கிலத்தில் நடிக்கும் 4-வது படம் இது என்றும், 2-வது ஹாலிவுட் படம் என்றும் அவரது மனைவில் கமீலா தெரிவித்துள்ளார்.

1948-ஆம் வருடம் மகாத்மா காந்தி கொல்லப்பட்டது குறித்து நிலவும் தகவல்களை வைத்து, கற்பனைக் கலந்து எடுக்கப்படவுள்ள படம் இது. தற்போது ரஜினிகாந்துடன் கபாலி படப்பிடிப்பில் நடித்திக் கொண்டிருக்கும் நாசர், பிப்ரவரி மாதக் கடைசியில் இந்தப் படத்தில் நடிக்கவுள்ளார்.

மகாத்மா காந்தியை காக்க நியமிக்கப்பட்ட அசோக் என்ற போலீஸ் அதிகாரியாக நாசர் நடிக்கவுள்ளார். காந்தியின் மரணத்தின் போது 3 போலீஸ் அதிகாரிகளின் வாழ்க்கை என்ன ஆனது என்பதை இந்தப் படம் பேசவுள்ளது. இந்தப் படத்தில் வின்னி ஜோன்ஸ், அலீஸா நாவல்லீ உள்ளிட்ட ஹாலிவுட் நடிகர்களும் நடிக்கின்றனர்.

ஜீஸச் சான்ஸ் என்ற நடிகர் மகாத்மா காந்தியாக நடிக்கவுள்ளார். இந்தப் படத்தை கரீம் ட்ரையாதியா இயக்கவுள்ளார். பிரஷாந்த் பிள்ளை இசையமைக்கிறார்.

தயாரிப்பாளர் தயார்… ‘மருதநாயகம்’ சாத்தியமே: கமல்

February 8, 2016

maruta

மருதநாயகம் படத்தை மீண்டும் துவங்குவதற்கான சாத்தியங்கள் இருப்பதாக நடிகர் கமல்ஹாசன் தெரிவித்துள்ளார்.

1997-ஆம் ஆண்டு கமல்ஹாசனின் தயாரிப்பு, இயக்கம் மற்றும் நடிப்பில் ஆரம்பமான படம் மருதநாயகம். இந்தப் படத்தின் துவக்க விழாவுக்கு ராணி எலிசபத்தை வரவழைத்து பிரம்மாண்டமான முறையில் துவக்க விழாவை கமல் நடத்தியிருந்தார். ஆனால் அதிக பொருட்செலவு காரணமாக இந்தப் படத்தின் படப்பிடிப்பு நின்று போனது.

தொடர்ந்து அவ்வபோது மருதநாயகம் படம் மீண்டும் துவக்கப்படுவதைப் பற்றி கமல்ஹாசனும், அதை ஆவலோடு எதிர்நோக்கும் ரசிகர்களும் பேசி வருகின்றனர். தற்போது, ‘தி இந்து’ (ஆங்கிலம்) நாளிதழுக்கு அளித்த பேட்டி ஒன்றில், மருதநாயகம் மீண்டும் துவங்க சாத்தியங்கள் இருப்பதாக கமல்ஹாசன் தெரிவித்துள்ளார்.

“லண்டனில் எனக்கு ஒரு நண்பர் இருக்கிறார். ஒரு திரைப்பட தயாரிப்பாளர். அவர் மருதநாயகத்தை தயாரிக்க தயாராக இருக்கிறார். படத்தை எப்போது துவங்கவேண்டும் என்று நினைக்கிறீர்களோ அப்போது என்னை அழையுங்கள் என்று கூறியுள்ளார்.

ஆனால் எனக்கு படத்தை சர்வதேச அளவில் கொண்டு போகும் அளவுக்கு சிலர் தேவை. சமீபத்தில் இந்தப் படத்தை என்னுடன் இணைந்து எழுதிய ழான் க்ளூடை சந்தித்தேன். மருதநாயகத்தின் கதை இன்றளவும் நன்றாக உள்ளது எனக் கூறினார்.

அதிர்ஷ்டவசமாக என்னிடம் படத்தின் முதல் 30 நிமிடங்கள் தயாராக உள்ளது. இது அபூர்வமான விஷயம். ஒரு சில பகுதிகளாக படம்பிடித்திருந்தேன். அதை ஒன்றாக்கி, “12 வருடங்களுக்குப் பிறகு” என டைட்டில் போடும் வரை தயாராக உள்ளது. நான் விட்ட இடத்திலிருந்துதான் துவங்க வேண்டும். படத்தயாரிப்பில் விநோதமான, தனித்துவமான ஒரு சூழல் இது. நாண் மீண்டும் துவங்கினால் படத்தை முடிக்க 1 வருடம் ஆகும். முன் தயாரிப்பு வேலைகள் மட்டுமே ஆறிலிருந்து ஏழு மாதங்கள் ஆகும். ஆனால் மருதநாயகம் சாத்தியமே”

இவ்வாறு கமல்ஹாசன் பேசியுள்ளார். லைகா நிறுவனம் மருதநாயகம் திரைப்படத்தை தயாரிக்கலாம் என்ற வதந்திகளும் தற்போது உலவி வருவது குறிப்பிடத்தக்கது.

சிம்பு தவறவிட்டார் ஜெயம்ரவி செய்துவிட்டார்

February 8, 2016

ravi

தமிழ்த்திரையுலகில் இதுவரை இல்லாத மாதிரி அல்லது முதன்முறையாக என்று சொல்லுகிற முயற்சி அவ்வப்போது நடக்கும். அதுபோலத்தான் இப்போது சக்திசௌந்தர்ராஜன் இயக்கத்தில் ஜெயம்ரவி லட்சுமிமேனன் நடித்திருக்கும் மிருதன் படத்திலும் நாயகனின் வேடம் இதுவரை வராதது என்கிறார் இயக்குநர்.

இந்தப்படத்தில் போக்குவரத்துக்காவலராக நடிக்கிறார் ஜெயம்ரவி. இதுவரை நமது கதாநாயகர்கள், சட்டம்ஒழுங்கு காவல்அதிகாரி, துப்பறியும் அதிகாரி, சிபிஐ அதிகாரி எனப் பல்வேறு வேடங்களை ஏற்றிருக்கிறார்கள். ஆனால் போக்குவரத்துக் காவலராக நடித்ததில்லையாம். இந்த முதன்முறை பெருமையை சில மாதங்கள் முன்னால் தவறவிட்டிருக்கிறார் சிம்பு.

செல்வராகவன் இயக்கத்தில் சிம்பு நடிப்பில் தயாரான கான் படத்தில் சிம்புவுக்கு போக்குவரத்துக்காவலர் வேடம்தான். அந்தப்படத்தைப் பாதியில் நிறுத்தியதால் முதன்முறையாக போக்குவரத்துக் காவலர் வேடத்தில் நடித்தவர் என்கிற இடத்தை ஜெயம்ரவி பிடித்துவிட்டார்.

இந்தவேடத்தில் நடித்தால் படத்துக்கு ஆபத்து என்கிற செண்டிமெண்ட் இருக்கிறதோ என்னவோ? அந்தப்படம் பாதியில் நின்றது இந்தப்படத்துக்கு தணிக்கையில் ஏ சான்றிதழ். இதனால் பிப்ரவரி 19 அன்று வெளியாகவிருக்கும் இந்தப்படத்தில் வசூலில் முப்பதுவிழுக்காடு வரி செலுத்தியாக வேண்டும்.

திரை விமர்சனம்: விசாரணை

February 6, 2016

vi

ஆந்திரப்பிரதேசம், குண்டூரில் சில் லறை வேலைகள் செய்து பிழைக் கிறார்கள் தமிழ் இளைஞர்களான பாண்டியும் (தினேஷ்) அவனது மூன்று நண்பர்களும். வாடகை வீடு எடுத்துத் தங்கும் அளவுக்கு வருமானம் இல்லாத அவர்கள், ஊரின் பொதுப் பூங்காவில் தங்கியிருக்கிறார்கள். அவர்களைக் கைதுசெய்து லாக்அப்பில் அடைக்கும் உள்ளூர் போலீஸ், அவர்கள் செய்யாத குற்றத்தைச் சுமத்தி அதை ஏற்றுக்கொள்ளச் சித்திரவதைகள் மூலம் நிர்ப்பந்திக்கிறது.

இறுதியாக நீதிமன்றத்தின் முன் நிறுத்தப்படும் அவர்களுக்குத் தப்பிக்க ஒரு வாய்ப்பு கிடைக்கிறது. அதே நீதிமன்றத் தில் சரணடைய வரும் பிரபல அரசியல் தரகரான கே.கே-வை (கிஷோர்) கைது செய்ய வரும் தமிழகக் காவல் அதிகாரியான முத்துவேல் (சமுத்திரக்கனி) உதவியுடன் விடுதலையாகிறார்கள். தங்கள் நன்றியைக் காட்ட அவருக்கு உதவப்போய் வாழ்வா, சாவா என்ற பொறியில் மாட்டிக்கொள்கிறார்கள். மாட்டிக்கொண்டவர்கள் என்ன ஆனார்கள்? சமுத்திரக்கனிக்கும் கிஷோருக்கும் என்ன ஆயிற்று என்பதுதான் ‘விசாரணை’யின் பதைபதைக்க வைக்கும் கதை.

மு.சந்திரகுமார் எழுதிய ‘லாக்கப்’ என்னும் நாவலின் அடிப்படையில் உருவாக் கப்பட்டுள்ள இந்தத் திரைப்படம் கசப்பான சில உண்மைகளை அப்பட்டமாகப் பேசுகிறது. காவல் துறை விசாரணையின் நிஜ முகத்தின் குரூரத்தைக் காட்டுகிறது. காவலர்கள் ஏன் அப்படிச் செய்கிறார்கள் என்பதையும் அவர்களால் எப்படி அதைச் செய்ய முடிகிறது என்பதையும் இயல்பாக வெளிப்படுத்துகிறது. அப்பாவிகள் மீது கொடுமைகளைக் கட்டவிழ்த்துவிடும் இவர்கள், வேறொரு தளத்தில் இதே அமைப்பின் பலிகடாக்களாக மாறும் முரண்பாட்டையும் சித்தரிக்கிறது.

வெற்றி மாறன் முன்னிறுத்தும் யதார்த்தம் முகத்தில் அறையும் நடைமுறை யதார்த்தம். நம்மை முழுமையாக உள்ளே இழுத்துக் கொள்ளும் சித்தரிப்புத் திறனுடன் இந்த யதார்த்தம் முன்வைக்கப்படும்போது அது நமக்கு நெருக்கமான அனுபவமாக மாறி விடுகிறது. இந்தச் சூழலில் யாருக்குமே நிஜமான பாதுகாப்பு இல்லை என்பதைப் பார்வையாளர்களுக்கு உணர்த்திவிடுவது தான் இந்தப் படத்தின் பெரிய வெற்றி.

திருப்பங்கள் எதையும் திணிக்காம லேயே விறுவிறுப்பைக் கூட்ட முடியும் என்பதை வெற்றி மாறன் காட்டியிருக்கிறார். பார்ப்பவர்கள் முகத்தில் ரத்தம் தெறிப்பதுபோல் உணரவைக்கும் மிகை வன்முறை, இரைச்சலிடும் பின்னணி இசை, மிகையான உணர்ச்சிகள் போன்றவற்றைத் தவிர்த்துவிட்டு, நேரடி சாட்சிபோல விரியும் காட்சிகள் படத்துக்குள் நம்மை இழுத்துக்கொள்கின்றன.

வெளி மாநிலத்தில் உதிரிகளாக வாழும் தமிழ் இளைஞர்களின் வாழ்வைச் சிக்கன மான காட்சிகளின் மூலம் முழுமையாகப் புரியவைத்துவிடுகிறார். செய்யாத குற் றத்தை ஒப்புக்கொள்ளக் கூடாது என்னும் அவர்களது உறுதியைத் தகர்க்கும் தந்திரங் களைக் காட்சிப்படுத்திய விதம், காவல் துறைச் செயல்பாடுகளின் வெவ்வேறு பரிமாணங்களையும் உணர்த்துவதாக உள்ளது.

ஏழைகள், அப்பாவி மனிதர்களுக்குப் பாதுகாப்பைத் தர வேண்டிய காவல் நிலையங்கள், அவர்கள்மீது மிக எளிதாக மனித உரிமை மீறல்களைக் கட்டவிழ்த்து விடுவதை நம்பகத்தன்மையுடன் காட்டி யிருக்கிறது படம்.

இந்த உரிமை மீறல்களின் நிஜமான சூத்திரதாரிகள் காவலர்களோ, காவல் அதிகாரிகளோ அல்ல; அவர்களை பொம்மைகளாக ஆட்டுவிக்கும், அதிகார வர்க்கம் என்பதைத் தோலுரித்துக் காட்டும் இரண்டாம் பகுதி, படத்தை விரிவான தளத்துக்குக் கொண்டுசெல்கிறது. காவல் துறை உள்ளிட்ட நமது குற்றவியல் நடைமுறை அமைப்பு சீரமைக்கப்பட வேண்டியிருக்கிறது என்ற விழிப்புணர்வையும் ஏற்படுத்துகிறது.

பல காட்சிகள் மனதில் நிற்கின்றன. கோயில் பிரசாதத்தைக் கொடுக்கும் காவல் துறை அதிகாரி மீது கைதிகளுக்குப் பிறக்கும் நம்பிக்கை உடையும் இடம், பல் உடைந்த பிறகு, “எனக்கு பல்லுதான் அழகுன்னு எங்கம்மா சொல்லும்” என்று முருகதாஸ் வருத்தப்படும் இடம், கடைசிக் காட்சிகளில் கிஷோரின் பரிதவிப்பு, விசாரணைக் கைதியின் மரணத்துக்குப் பின் காவலர்கள் போடும் திட்டம் ஆகியவற்றைக் குறிப்பிட்டுச் சொல்லலாம்.

காவல் துறை அதிகாரிக்கு இந்த இளைஞர்கள் மீது சந்தேகமும் பயமும் வருவதற்கான காட்சியில் போதிய அழுத்தம் இல்லை என்பதைப் படத்தின் குறையாகச் சொல்லலாம்.

தினேஷ், ‘ஆடுகளம்’ முருகதாஸ், சமுத்திரக்கனி, கிஷோர் ஆகியோர் தாங்கள் ஏற்ற கதாபாத்திரங்களுக்கு நம்பகத்தன்மையும் இயல்பும் கூடிய நடிப்பை வழங்கியிருக்கிறார்கள். தன்னால் அந்த இளைஞர்களுக்கு ஏற்பட்ட அபாயத்தைக் கண்டு கண் கலங்கும் இடத்தில் சமுத்திரக்கனி மனதைத் தொடுகிறார். காவல் துறை விசா ரணையைத் தன் தொழிலுக்கே உரிய கெத்துடன் எதிர்கொள்ளும் கிஷோர், காவலர்களின் ‘கவனிப்பு’க்குப் பிறகு மண்டியிட்டுத் தவழ்ந்து பம்மும் காட்சியில் அசரவைக்கிறார்.

காவலர்களின் பேச்சிலும், கைதி களின் பேச்சிலும் யதார்த்தம் தெறிக் கிறது. சமுத்திரக்கனி, கிஷோரின் உரையாடலில் அதிகார மொழியின் நுட்பம் வெளிப்படுகிறது.

பாடல்களே இல்லாத இந்தப் படத்தில் பின்னணி இசையில் ஜி.வி.பிரகாஷ் கவனிக்க வைக்கிறார். கிஷோரின் எடிட்டிங் படத்துக்கு கச்சிதத் தன்மையை வழங்குகிறது. ராமலிங்கத்தின் ஒளிப் பதிவு படத்தின் யதார்த்தத்தைக் காட்சிப் படுத்துவதில் துல்லியமாகச் செயல் படுகிறது.

அதிகார பீடத்தில் இருப்பவர்கள் தங் களைத் தற்காத்துக்கொள்ள எந்த எல்லைக்கும் சென்று மனித உயிர்களை எடுக்கவும் தயங்காத ஜனநாயக பயங்கர வாதிகளாக மாறியிருப்பதை, விளிம்பு நிலை இளைஞர்களைக் கொண்டு சொன்ன விதத்தில் வலுவான அரசியல் படமாகவும் மாறியிருக்கிறது விசாரணை.

சென்னையில் பின்னணி பாடகி மர்ம மரணம்

February 6, 2016

sing

எங்கேயும் எப்போதும்’, ‘ பறவை’ உள்ளிட்ட பல படங்களில் பாடல்கள் பாடியுள்ள பின்னணி பாடகி ஷான், சென்னையில் உள்ள தனது வீட்டில் மர்மமான முறையில் இறந்து கிடந்த சம்பவம் பரபரப்பை ஏற்படுத்தியுள்ளது.

அவரது உடலை கைப்பற்றிய போலீஸார், ஷான் கொலை செய்யப்பட்டாரா? என்ற கோணத்தில் விசாரணை நடத்தி வருகிறார்கள். மலையாள திரை உலகில் பிரபல இசையமைப்பாளரான ஜான்சன் மாஸ்டர் என்பவர் கடந்த 2011-ம் ஆண்டு காலமானார்.

இவரது மகளான ஷான் (வயது 31) திருமணம் ஆகி கணவரை பிரிந்து சென்னை அசோக் நகரில் வசித்து வந்தார். மயிலாப்பூரில் உள்ள தனியார் கம்பெனி ஒன்றில் மார்க்கெட்டிங் மேலாளராக பணிபுரிந்து வந்தார்.

தமிழில் எங்கேயும் எப்போதும் மற்றும் பறவை ஆகிய படங்களில் ஷான் பாடியுள்ளார்.

வியாழக்கிழமை இரவு தன்னுடைய உறவினர்களிடம் ஷான் செல்போனில் நன்றாக பேசியுள்ளார்.

இரவு சாப்பிட்டுவிட்டு வீட்டுக்குள் உறங்க சென்ற அவர், நேற்று மாலை நேரம் ஆகியும் வீட்டை விட்டு வெளியே வரவில்லை. இதனால் சந்தேகம் அடைந்த அக்கம்பக்கத்தினர் போலீசாருக்கு தகவல் கொடுத்தனர்.

போலீசார் வந்து கதவை திறந்து பார்த்த போது, ஷான் மர்மமான முறையில் இறந்து கிடந்தார்.

உடல் முழுவதும் கருப்பு நிறமாக மாறி இருந்ததாக அவர்கள் தெரிவித்தனர். மேலும், அவருக்கு வலிப்பு நோய் இருந்ததாகவும் கூறப்படுகிறது. இதுகுறித்து அசோக் நகர் போலீசார் வழக்குப்பதிவு செய்து விசாரணை நடத்தி வருகின்றனர்.

நடிகையை கொன்றது ஏன்? வில்லன் நடிகர் வாக்குமூலம்

February 6, 2016

sasi

நான் குடிப்பதை நிறுத்த மாட்டேன்’ என்ற படத்தின் கதாநாயகியான சசிரேகாவை தலை துண்டித்து கொலை செய்தது ஏன் என்பது குறித்து வில்லன் நடிகர் ரமேஷ் சங்கர் காவல்துறையினரிடம் பரபரப்பு வாக்குமூலம் அளித்துள்ளார்.

சென்னை போரூர் ராமாபுரம் பூந்தமல்லி நெடுஞ்சாலையில் கடந்த மாதம் 5ம் தேதி இளம்பெண் ஒருவர் தலை துண்டிக்கப்பட்ட நிலையில் நிர்வாணமாக கொலை செய்யப்பட்டு கிடந்தார்.

இது தொடர்பாக ராயலாநகர் காவல்துறையினர் வழக்குப்பதிவு செய்து விசாரணை நடத்தினர். 30 நாட்களுக்குப்பிறகு கொலை செய்யப்பட்ட பெண் சென்னை மடிப்பாக்கத்தை சேர்ந்த சினிமா துணை நடிகை சசிரேகா (39) என்பது தெரியவந்தது.

இதனையடுத்து அவரது கணவர் சினிமா வில்லன் நடிகர் ரமேஷ் சங்கர் (40), கேரளாவை சேர்ந்த லக்கியா (25) இருவரையும் காவல்துறையினர் நேற்று கைது செய்தனர். மனைவியை கொலை செய்தது ஏன் என்று ரமேஷ்சங்கர் காவல்துறையினர் பரபரப்பு வாக்குமூலம் அளித்துள்ளார். அதன் விவரம் வருமாறு:

எனக்கு ஏற்கனவே ஒரு பெண்ணுடன் 2011ம் ஆண்டு திருமணம் நடந்தது. சென்னை குரோம்பேட்டை அனகாபுத்துாரில் எனது மனைவி மாமியார் ஆகியோருடன் வசித்து வந்தேன். ஏலச்சீட்டு தொழில் செய்து வந்த எனக்கு கடன் சுமை ஏற்பட்டது. இதனால் மனைவியுடன் அடிக்கடி தகராறு வந்தது.

இதனால் ஆத்திரமடைந்த எனது மனைவி, மாமியார் ஆகியோர் துாக்குப்போட்டு தற்கொலை செய்துக்கொண்டனர். தனிமைப்படுத்தப்பட்ட நான் வடபழனியில் உள்ள எனது சித்தப்பா வீட்டில் தங்கினேன்.

பணத்தேவை ஏற்பட்டதால் வெளிநாட்டுக்கு வேலை வாங்கித்தருவதாக கூறி பல நபர்களிடம் ரூ.70 லட்சம் வரையில் வசூல் செய்துவிட்டு காவல்துறையினர் தேடியதால் தலைமறைவாகினேன்.

கடந்த ஆண்டு ஆகஸ்ட் மாதம் சசிரேகாவை மடிப்பாக்கத்தில் வைத்து சந்தித்தேன். அவர் சினிமாவில் நடிக்க வாய்ப்பு தேடி வந்தார். எனக்கு சினிமா பிரமுகர்கள் பலரிடம் பழக்கம் இருந்து வந்ததால் அவருக்கு ஓரிரு படங்களில் நடிப்பதற்கு சான்ஸ் வாங்கிக் கொடுத்தேன்.

இந்தப்பழக்கம் எங்களுக்குள் காதலாக மாறி இருவரும் திருமணம் செய்து கொண்டோம். சசிரேகா ஏற்கனவே திருமணம் ஆனவர். 8 வயதில் ஒரு மகன் உள்ளான். அவரது கணவர் சாலமன் பிரபு கருத்து வேறுபாடு காரணமாக பிரிந்து சென்று விட்டார்.

நான், சசிரேகா, அவரது மகன் மூவரும் மடிப்பாக்கத்தில் வீடு வாடகைக்கு எடுத்து தங்கினோம்.

இந்நிலையில் எனக்கு வளசரவாக்கத்தை சேர்ந்த லக்கியா (22) என்ற பெண்ணுடன் நெருக்கம் ஏற்பட்டது. இந்த விஷயம் சசிரேகாவுக்கு தெரியவந்ததும் என்னிடம் தகராறு செய்தார்.

இது தொடர்பாக மடிப்பாக்கம் காவல் நிலையத்தில் அவரது மகனை நான் கடத்தி சென்று விட்டதாக செப்டம்பர் மாதம் புகார் அளித்தார். காவல்துறையினர் எங்கள் இருவரையும் அழைத்து சமாதானமாக பேசி சேர்த்து வைத்தனர்.

இதனையடுத்து நான் மனைவி சசிரேகா உடன் குன்றத்தூர் அருகே உள்ள மதனந்தபுரம் பகுதியில் வீடு எடுத்து தங்கினேன். லக்கியாவின் தொடர்பை விடமுடியாததால் மனைவி இல்லாத சமையத்தில அவரை அடிக்கடி வீட்டுக்கு அழைத்து வருவேன்.

கடந்த ஜனவரி மாதம் 4ம் தேதி லக்கியாவுடன் சேர்ந்து இருந்த போது சசிரேகா பார்த்துவிட்டார். என்னிடம் தகராறு செய்ததோடு, காவல்நிலையத்தில் புகார் அளிக்கப்போவதாக மிரட்டினார்.

லக்கியாவை விட்டுவிட்டு தன்னுடன் வரும்படி அழைத்தார். அதற்கு நான் சசிரேகாவை சமாதானப்படுத்தி மதநந்தபுரத்திலே தங்க வைத்தேன்.

அன்றைய தினம் இரவு லக்கியா உடன் சேர்ந்து எனது மனைவியை கழுத்தை நெரித்து கொன்றேன். பின்னர் அவரது தலையை வெட்டி கெருகம்பாக்கம் அருகிலுள்ள ஏரியில் தலையை வீசிவிட்டு உடலை ராமாபுரம் அருகிலுள்ள குப்பை தொட்டியில் போட்டுவிட்டு தப்பி ஓடிவிட்டேன்” என்று ரமேஷ்சங்கர் வாக்குமூலம் அளித்துள்ளதாக காவல்துறையினர் தெரிவித்துள்ளனர்.

பாதாள சாக்கடைக்குள் கிடந்த சசிரேகாவின் தலை

இந்த கொலை வழக்கில் சசிரேகாவின் தலையை கண்டுபிடிக்க முடியாமல் காவல்துறையினர் அதனை தேடும் பணியில் தீவிரமாக களம் இறங்கினர். தலையை வெட்டி வீசியதாக கொலையாளி ரமேஷ் சங்கர் சொன்னதன் பேரில் கெருகம்பாக்கம் ஏரியில் சென்று காவல்துறையினர் தலையை தேடினர்.

ஆனால் தலை கிடைக்கவில்லை. தலையை தேடும் பணியில் மோப்பநாய்களும் ஈடுபடுத்தப்பட்டன. இந்நிலையில் கொளப்பாக்கம் ராமமூர்த்தி அவென்யூவில் உள்ள ஒரு பாதாள சாக்ககடைக்குள் மனித தலை கிடப்பதாக காவல்துறையினருக்கு தகவல் கிடைத்தது.

காவல்துறையினர் அந்த இடத்திற்கு சென்று தலையை கைப்பற்றி விசாரணை நடத்திய போது அது சசிரேகாவின் தலை என்பது தெரியவந்தது.

‘நான் குடிப்பதை நிறுத்த மாட்டேன்’ என்ற படத்தில் சசிரேகா கதாநாயகியாக நடத்துள்ளார். அதே படத்தில் ரமேஷ் சங்கர் வில்லனாக நடித்துள்ளார். கேரளாவை சேர்ந்த லக்கியா துணை நடிகை ஆவார்.

-எஸ்.மகேஷ்

விகடன் குழு விசாரணை படம் பற்றி நடத்திய கருத்தரங்கு ( காணொளி )

February 6, 2016

vissa

பதினாறு வயதினிலேக்கு பின் சிறந்த திரைப்படம்..

விசாரணை’ படமும் விஷ்ணுப்ரியா மரணமும்…!

February 6, 2016

visaranai

போலீஸ் சிஸ்டம்’ எத்தனை கொடூரமாக இருக்கிறது..? மூர்க்கத்தனமான அந்த சிஸ்டத்தோடு அரசியல் அதிகார மையம் கைகோர்த்த பிறகு வெளிப்படும் அரக்கத்தனம் எத்தகையது ..? எப்பேர்பட்ட ஆளாக இருந்தாலும் அந்த சிஸ்டத்தினுள் சிக்கிக்கொண்டால் என்னவெல்லாம் நடக்கும்…? ஒரு முறை “விசாரணை” படத்துக்கு சென்று வந்தீர்களானால் அதிர்ந்துபோவீர்கள்.

நம் ஒவ்வொருவருக்கும் தெரிந்த அல்லது படித்த ஏதேனும் காவல்நிலைய சம்பவத்தை இந்த படம் நமக்குள் நிச்சயம் கடத்தும். கேள்வி எழுப்பும், சிந்திக்கத் தூண்டும், அரசியலின் ஆழம் உணர்த்தும். அதிகாரத்தின் கோர முகம் காட்டும். படத்தில் சமுத்திரக்கனி சுட்டுக் கொல்லப்படுவதும் நிஜத்தில் விஷ்ணுப்ரியா தூக்கில் தொங்கியதும் நிழலுக்கும் நிஜத்துக்குமான பிணைப்பைச் சொல்கிறது. இந்த போலீஸ் சிஸ்டத்தில் போலீஸே சிக்கினால் கூட மீளமுடியாது என்பதே நிதர்சனம்!

கோகுல்ராஜ் கொலை, யுவராஜ் தலைமறைவு, டி.எஸ்.பி விஷ்ணுப்ரியா தற்கொலை… இந்த மூன்று சம்பவங்களுமே தமிழகத்தை அதிரச்செய்த சம்பவங்கள். இதில் கோகுல்ராஜுக்காக நடந்த போராட்டத்தையும், யுவராஜுக்காக நடந்த சாதிய கூப்பாடுகளையும், விஷ்ணுப்ரியா குடும்பத்தின் கண்ணீரையும் மட்டுமே ஊடகங்களால் மக்களுக்கு கொண்டுபோய்ச் சேர்க்க முடிந்தது. அதிகப்படியாக அந்தச் சம்பவத்தில் இருக்கும் சந்தேகங்களை எழுப்ப முடிந்ததே தவிர போலீஸ் சிஸ்டத்தை மீறி எந்த அமைப்பும் எதுவும் செய்ய முடியாமல் போனது. ‘விசாரணை’ படத்தில் க்ளைமாக்சில் ஒரு போலீஸ் அதிகாரியை சுட்டுக் கொன்றுவிட்டு , ’இந்தப் பக்கம் அவர் கல்யாண போட்டோவையும் அந்தப் பக்கம் அவர் மனைவி அழுகும் போட்டோவையும் போட்டுட்டா எல்லாத்தையும் மறந்துடுவாங்க. ’போலீஸுக்கு பாதுகாப்பு இல்லை’னு அதைத்தான் மீடியாவும் கவர் பண்ணுவாங்க’னு என ஒரு போலீஸ்காரர் சொல்வது நூற்றுக்கு நூறு இங்கு நிதர்சனம்.

கோகுல்ராஜ் கொலைவழக்கை விசாரித்துவந்த திருச்செங்கோடு டி.எஸ்.பி விஷ்ணுப்ரியா திடீரென்று தூக்கில் தொங்கினார். (அது தற்கொலைதானா என்ற சந்தேகமும் இல்லாமல் இல்லை ). என்ன காரணம் என்று தெரியமல் எல்லோரும் முழித்துக்கொண்டிருந்த நேரத்தில் விஷ்ணுப்ரியாவின் தோழியான கீழக்கரை டி.எஸ்.பி மகேஸ்வரி கொடுத்த பேட்டி எல்லோருரையும் உலுக்கியது. “கோகுல்ராஜ் கொலைவழக்கில் சம்பந்தமே இல்லாத மூன்று பேர் மீது குண்டாஸ் போடச்சொல்லி எங்கள் மேலதிகாரி டார்ச்சர் செய்தார். ’இந்த வழக்குக்கும் அந்த மூணு பேருக்கும் துளியும் சம்பந்தம் இல்லை. இதைச் செய்றதுக்காகவா நான் போலீஸ் வேலைக்கு வந்தேன். எனக்கு என்ன பண்றதுனே தெரியல..?’னு புலம்பிட்டே இருந்தா, திடீர்னு எஸ்.பி லைன்ல வர்றார்னு போனை கட்பண்ணிட்டா அதுக்கப்புறம் என்ன நடந்துச்சுனு தெரியலை. தூக்குல தொங்கிட்டானு சொல்றாங்க. அவ தற்கொலை பண்ணிக்கிற அளவுக்கு கோழை கிடையாது. எல்லாத்துக்கும் எஸ்.பிதான் காரணம். இதச் சொல்றதால எனக்கு வேலை கூட போகலாம் அதை பத்தி கவலை இல்லை என்று பகிரங்கமாக இருந்தது அவர் பேட்டி.

அதன் பிறகுதான் அந்த மேலதிகாரி மீது எல்லோர் பார்வையும் திரும்பியது. விஷ்ணுப்ரியாவின் உடலை மீட்க யாரையும் அனுமதிக்காமல் தனக்கு நெருக்கமான ஒரு போலீஸ் அதிகாரியோடு அவர் மட்டும் உள்ளே சென்றதையும், விஷ்ணுப்ரியாவின் செல்ஃபோன்,டேப்லெட், மரண வாக்குமூலம் உள்ளிட்ட எல்லாவற்றையும் அவரே கைப்பற்றிச் சென்றுவிட்டார் என்றும் தகவல் வந்தது. அதுமட்டுமல்லாது விஷ்ணுப்ரியாவின் பெற்றோரிடத்தில் கடைசிவரை அவருடைய செல்ஃபோன்களை ஒப்படைக்காததும் மரண வாக்குமூலத்தில் ஒவ்வொரு பக்கமாக வெளிவந்ததும் அந்த மேலதிகாரி மீது பலத்த சந்தேகத்தை ஏற்படுத்தியது. ஆனால் அவரோ எதற்கும் சளைக்கவில்லை.

விஷ்ணுப்ரியாவின் மாமா ஆனந்தன், “போலீஸ்காரங்க கதவை உடைச்சி உள்ளே போன மாதிரியெல்லாம் தெரியலை. ஸ்க்ரூவை கழட்டி செட் பண்ண மாதிரி இருக்கு. அவ தொங்குன இடத்துக்கு நேரா ஒரு கயிறு இருக்கு. அந்த இடைஞ்சல்ல போய் எப்படி தொங்குனா..? இது தற்கொலையே கிடையாது’ என்று பல சந்தேகங்களை அடுக்கினார். அதற்கும் எந்தப் பதிலும் இல்லை. அப்போதான் சி.பி.ஐ. விசாரணைக்கு கோரிக்கை வைக்கப்பட்டது. தமிழக அளவில் பெரும் பிரச்னையாக உருவெடுத்து போலீஸ் துறைக்கே நெருக்கடியாக இந்த விவகாரம் விஸ்வரூபமெடுக்கவும் அரசு உஷாரானது. ஆனால், ‘இது ஒன்றும் அவ்வளவு சிக்கலான வழக்கு கிடையாது’ என்று முதல்வர் ஜெயலலிதாவே அறிவித்து வழக்கை சி.பி.சி.ஐ.டிக்கு மாற்றி உத்தரவிட்டார்.

அதிலிருந்துதான் ஆட்டம் ஆரம்பித்தது. குற்றம் சுமத்தப்பட்ட அந்த அதிகாரியின் நண்பர் எனப்படுபவரே விசாரணை அதிகாரியாக நியமிக்கப்பாட்டார். அவர் தலைமையிலான குழு ஊடகங்களை திசை திருப்புவதற்கான வேலைகளில் மும்முரமாக இறங்கியது. முதலில் காதல் விவகாரம் என்று கசியவிட்டார்கள். மதுரையில் இருந்து மாளவியா என்ற வழக்கறிஞரை அழைத்துவந்து விசாரித்தார்கள். விசாரணை முடிந்து வந்த மாளவியா, ’நானும் விஷ்ணுப்ரியாவும் லவ் பண்ணோம்னு ஒத்துக்கச் சொல்லி கட்டாயப்படுத்துறாங்க’ என அதிரடியாக பேட்டி கொடுக்கவும், போலீஸ் குட்டு வெளிவந்தது. அடுத்ததாக கோயில் பூசாரி விஜயராகவனை வளைத்துப் பார்த்தார்கள். அதுவும் பல்லிளித்துவிட்டது. இந்த இடைப்பட்ட பரபரப்பில் கீழக்கரை டி.எஸ்.பி மகேஸ்வரி சுத்தமாக ஆஃப் செய்யப்பட்டுவிட்டார். ஊடகங்களுக்கும் அடுத்தடுத்த பரபரப்புச் செய்திகள் கிடைத்தும் விஷ்ணுபிரியாவை மறந்துவிட்டார்கள். ஆக, இறுதிவரை அந்த அதிகாரியை விசாரிக்கவும் இல்லை.. அவர் மீது நடவடிக்கையும் இல்லை. அதன் பின்னணியும் அப்படியே அமுக்கப்பட்டுவிட்டது!

விசாரணை படத்தில் சொல்வது போல இன்றைக்கு விஷ்ணுப்ரியாவின் வழக்கு ஒருத்தர் மூலம் முடிக்கப்பட்டிருந்தால், நாளை அவருடைய வழக்கு இன்னொருவரை வைத்து முடிக்கப்படும். இதுதான் இன்று நம் போலீஸ் சிஸ்டம்.

வாழ்க… வளர்க..!

-எம்.புண்ணியமூர்த்தி

Next Page »