ரஜினி பிறந்த நாள்: திரையுலகப் பிரபலங்கள் வாழ்த்து

ரஜினியின் பிறந்த நாளை முன்னிட்டு அவருக்குத் திரையுலகப் பிரபலங்கள் பலரும் வாழ்த்து தெரிவித்து வருகிறார்கள்.
நடிகர் ரஜினிகாந்த் இன்று (டிசம்பர் 12) தனது 70-வது பிறந்த நாளைக் கொண்டாடி வருகிறார். அவருக்கு அரசியல் தலைவர்கள், திரையுலகப் பிரபலங்கள், ரசிகர்கள் எனப் பலரும் வாழ்த்து தெரிவித்து வருகிறார்கள். சென்னை போயஸ் கார்டனில் ரஜினி வீட்டின் முன்பு ரசிகர்கள் குவிந்து வருகிறார்கள். ஆனால், ரஜினி போயஸ் கார்டன் வீட்டில் இல்லை என்று தகவல் வெளியாகியுள்ளது.
தற்போது சிவா இயக்கத்தில் உருவாகி வரும் ‘அண்ணாத்த’ படத்தில் கவனம் செலுத்தி வருகிறார் ரஜினி. சன் பிக்சர்ஸ் நிறுவனம் தயாரித்து வரும் இந்தப் படத்தின் இறுதிக்கட்டப் படப்பிடிப்பு விரைவில் தொடங்கவுள்ளது. இதை முடித்துக் கொடுத்துவிட்டுத்தான் முழுநேர அரசியலில் ஈடுபடவுள்ளார் ரஜினி.
நேற்று (டிசம்பர் 11) மாலையில் ரஜினியின் பிறந்த நாள் கொண்டாட்டத்தை அவருடைய ரசிகர்கள் சமூக வலைதளத்தில் விமரிசையாகக் கொண்டாடினார்கள். அவருடைய பிறந்த நாளுக்கென்று பிரத்யேக போஸ்டர் ஒன்றை உருவாக்கி சுமார் 70 பிரபலங்கள் கொண்டு வெளியிட்டனர். இதில் ஏ.ஆர்.ரஹ்மான் உள்ளிட்ட பல்வேறு முன்னணி திரையுலகப் பிரபலங்களும் அடங்கும்.
இன்று (டிசம்பர் 12) காலை முதலே ரஜினியுடன் நடித்த திரையுலகப் பிரபலங்கள் அவருடன் எடுத்த புகைப்படங்களை வெளியிட்டுப் பிறந்த நாள் வாழ்த்து தெரிவித்து வருகிறார்கள். இதனால் ட்விட்டர் தளத்தில் இந்திய அளவில் #HappyBirthdayRajinikanth என்ற ஹேஷ்டேக் முதல் இடத்தில் ட்ரெண்டாகி வருகிறது.
ரஜினியின் பிறந்த நாளை முன்னிட்டு, தமிழகம் முழுவதும் ரஜினி மக்கள் மன்றம் சார்பில் பல்வேறு நலத்திட்ட உதவிகள் வழங்கப்படுகின்றன.
—–
நடிகர் ரஜினிகாந்த் இன்று தனது 70-வது பிறந்தநாளைக் கொண்டாடி வருகிறார். அவருக்கு பிரதமர் நரேந்திர மோடி, முதலமைச்சர் எடப்பாடி பழனிசாமி உள்ளிட்ட பல்வேறு தலைவர்களும், நடிகர், நடிகைகளும், அவரது ரசிகர்களும் தங்களது வாழ்த்துகளை தெரிவித்து வருகிறார்கள்.

இந்நிலையில் நடிகர் ரஜினிகாந்திற்காக பல்வேறு திரைப்பட பாடல்களை எழுதியவரும், அவரது நெருங்கிய நண்பருமான கவிஞர் வைரமுத்து, தனது டுவிட்டர் பக்கத்தில் பிறந்தநாள் வாழ்த்துச் செய்தி ஒன்றை பதிவிட்டுள்ளார். அதில் நடிகர் ரஜினிகாந்திடம் தொலைபேசியில் தொடர்பு கொண்டு வாழ்த்து தெரிவித்ததாக கூறியுள்ளார்.

மேலும், “எழுபது என்பது முதுமையின் இளமை அல்லது இளமையின் பெருமை” என்று பதிவிட்டுள்ள கவிஞர் வைரமுத்து, தனது நெருங்கிய நண்பரான ரஜினிகாந்த் உடல்நலத்தோடும், மன வளத்தோடும் பல்லாண்டு வாழ வாத்துவதாக தெரிவித்துள்ளார்.